Unikal əmanətçilər sürətlə artır: "Onların sayı hələ də azdır"

Azərbaycanda müddətli müqavilə ilə banka əmanət yerləşdirən şəxslərin sayı 150,5 min nəfərə çatıb. Bu, son bir ildə 41 faiz artım deməkdir.  
Qeyd edək ki, bu cür əmanətçilərə unikal əmanətçilər deyilir. 

Mərkəzi Bankdan verilən məlumata əsasən, artımın böyük hissəsi xırda məbləğli əmanətçilərin hesabına baş verib. Bankda əmanəti olanların 77,6 %-ni 30 000 manatadək məbləğdə əmanətləri olanlar təşkil edib. 

Məlumatlardan aydın olur ki, ölkəmizdə 18 yaşdan yuxarı olan şəxslərin hər 50 nəfərindən birinin bankda müddətli əmanət var. 

Sfera.az-a açıqlama verən iqtisadçı-ekspert Natiq Cəfərli hesab edir ki, Azərbaycanda unikal əmanətçilərin sayı sürətlə artsa da onların sayı hələ də azdır.
Onun sözlərinə görə, əhali nisbətinə görə Türkiyə, Gürcüstan və Rusiyadan çox geri qalırıq. 

Ekspert bildirdi ki, bunun bir neçə səbəbi var:

“Son 35 illik tarixə baxsaq, zaman-zaman əmanətçilərin bank sektroru ilə problemlər yaşadığını görərik. SSRİ-nin dağılmasından sonra dövlət banklarında böyük məbləğdə vəsaitin batması, eləcə də 2015-də baş verən devalvasiyalardan sonra çoxlu sayda bankın lisenziyasının ləğv edilməsi insanlarda bank sisteminə olan güvəni zəiflədib. 

Az əmanətçinin olmasının digər səbəbi Azərbaycan əhalisinin daha çox daşınmaz əmlaka investisiya etməsidir. Əhalinin yığım imkanı olan hissəsi Azərbaycanda, Türkiyədə və Gürcüstanda evlər və obyektlər alırlar. 

Üçüncü səbəb isə əhalinin çox hissəsinin gəlirinin aşağı olmasıdır. Orta statistik azərbaycanlının həm özünü təmin etməsi, həm də pul yığıb banka qoyması çətindir”. 

Firuzə Əliyeva