Bu şəxslərin maaşları artırıldı
Nazirlər Kabineti bir sıra dövlət qurumlarında çalışan və əməkhaqları dövlət büdcəsindən ödənilən işçilərin vəzifə maaşlarının məbləğlərini yeni redaksiyada təsdiqləyib. Bu barədə qərarı Baş nazir imzalayıb.
Sfera.az xəbər verir ki, məsələ ilə bağlı Milli Məclisin deputatı Vüqar Bayramov açıqlama verərək, artımların hansı səbəbdən baş verdiyini izah edib.
V.Bayramov xatırladıb ki, yeni qərara əsasən, Daxili İşlər Nazirliyinin Daxili Qoşunlarının Baş İdarəsinin hərbi qulluqçuları və mülki işçiləri, Dövlət Gömrük Komitəsinin xüsusi rütbəli əməkdaşları, həmçinin Dövlət Vergi Xidmətinin Aparatı və ona daxil olan qurumlarda çalışan xidmət heyətinin aylıq vəzifə maaşları artırılıb:
"Qərar Prezident İlham Əliyevin “Əhalinin sosial rifahının yaxşılaşdırılması sahəsində tədbirlərin davam etdirilməsi haqqında” Sərəncamına əsasən qəbul olunub. Həmin sərəncamda dövlət büdcəsindən maliyyələşdirilən sahələrdə çalışan işçilərin maaşlarının minimum əmək haqqındakı artımla uyğunlaşdırılması nəzərdə tutulurdu.
2025-ci ildən etibarən ölkədə minimum əmək haqqı 16 faiz artırılıb. Bununla əlaqədar olaraq, vəzifə maaşları da diferensial şəkildə artırılıb, yəni az maaş alanlarda daha yüksək faiz, yüksək maaşlı vəzifələrdə isə nisbətən aşağı faiz artımları tətbiq olunub. Lakin bütün əməkdaşlar üzrə artımlar vahid tarif cədvəlinə əsasən həyata keçirilib".
Bəsti Rəfizadə
