Bu həftə dollar ABŞ-nin güclü iqtisadi göstəriciləri ilə qlobal səviyyədə yüksəlməyə davam edib. Çərşənbə axşamı açıqlanan məlumatlara görə, ABŞ-də iş elanları noyabr ayında gözləniləndən çox artıb və işdən çıxarılmalar aşağı səviyyədə qalıb. Bu vəziyyət inflyasiyanın yenidən arta biləcəyi xəbərdarlığını gətirir. İstiqraz bazarlarında da aktivlik müşahidə olunub və 10 illik istiqraz gəlirləri 8 bənddən çox artaraq son 8 ayın ən yüksək səviyyəsi olan 4,7%-ə çatıb.

Mütəxəssislər bu vəziyyətin ABŞ Federal Ehtiyat Sisteminin (FED) faiz endirimlərini təxirə sala biləcəyi, hətta yeni faiz artımlarını düşünə biləcəyi bir mühit yaratdığını bildirirlər.

Çin yuanı ABŞ-nin yeni seçilmiş prezidenti Donald Trampın ticarət tariflərini artırmaqla hədələməsi səbəbindən son 16 ayın ən aşağı səviyyəsinə düşüb.

Ekspertlər yuanın daha da zəifləməsi ehtimalının olduğunu düşünürlər. Çin Mərkəzi Bankı gündəlik istinad məzənnəsini güclü səviyyələrdə təyin etməyə çalışaraq yuanın ucuzlaşmasına müqavimət göstərməyə çalışsa da, dollar/yuan məzənnəsinin tədricən 7,5 səviyyəsinə doğru irəliləməsi gözlənilir.

Trampın verdiyi vədlər avro və yeni təzyiq altında saxlayır. Avro dollar qarşısında son iki ilin ən aşağı səviyyəsinə enərək 1,0224-ə çatıb və hazırda 1,0323-də ticarət olunur.

Avropa Mərkəzi Bankının (AMB) faiz endirimi gözləntiləri avroya təzyiqi artırır. Yapon yeni də dollara nisbətdə 158,42-yə kimi ucuzlaşaraq son 6 ayın ən aşağı səviyyəsinə çatıb. Dekabr ayında Yaponiyada istehlakçı inamının azalması mərkəzi bankın faiz artımı üçün kifayət qədər əsas tapa bilməyəcəyi ilə bağlı narahatlıqları artırır.

Bu, yenin dollar qarşısında dəyər itirməyə davam etməsinə səbəb olur. Sadalanan faktorlar ABŞ dollarının bir qədər də bahalaşması ehtimalını gücləndirir. Hazırda Dollar İndeksi 109,1 həddindədir.

Analitiklər bildirirlər ki, əgər indeks 110 səviyyəsinə çatarsa, dollar psixoloji amillərin də təsiri ilə bir qədər də bahalaşacaq. Lakin ekspertlər dolların kursundakı dəyişikliyin daha çox Trampın iqtisadi siyasətindən asılı olacağını bildirirlər.

Vasif

Sfera.az

Dollar bir qədər də BAHALAŞACAQ - Hər şey Trampdan asılıdır