“Honor”un yeni seriyalı telefonu satışa çıxarıldı
“Honor” şirkəti 8100 mAh tutumlu nəhəng batareyası, süni intellekt funksiyalarına həsr olunmuş xüsusi düyməsi və yüksək davamlılıq sertifikatları ilə diqqət çəkən yeni “Honor 600S 5G” smartfonunu təqdim edib.
Sfera.az xəbər verir ki, şirkətdən verilən məlumata əsasən, orta seqment bazarına hesablanan yeni model uzun batareya ömrünü müasir süni intellekt imkanları və davamlı korpusla birləşdirib.
“Honor 600S 5G” 45 Vt sürətli enerji yığma dəstəyinə malik 8100 mAh tutumlu batareya ilə təchiz olunub. Şirkət bu göstəricinin smartfondan uzun müddət fasiləsiz istifadə imkanı yaradacağını bildirib.
Smartfonun texniki imkanları arasında “Snapdragon 4 Gen 4” prosessoru, 8 GB operativ yaddaş və “MagicOS 10” əməliyyat sistemi yer alıb.
Modelin diqqətçəkən xüsusiyyətlərindən biri də korpusda yerləşdirilən fiziki süni intellekt düyməsidir. Bu düymə vasitəsilə obyektlərin fotolardan silinməsi, axtarışların aparılması və mətnlərin xülasəsinin hazırlanması kimi funksiyalara bir toxunuşla çıxış əldə etmək mümkündür.
Şirkət telefonun davamlılığına da xüsusi diqqət yetirib. “Honor 600S 5G” 2,5 metr hündürlükdən düşməyə qarşı davamlılıqla yanaşı, IP68, IP69 və IP69K sertifikatlarına sahibdir.
Smartfonun ön hissəsində 120 Hz yenilənmə tezliyinə malik 6,87 düymlük TFT LCD ekran yerləşdirilib. Arxa paneldə isə 50 meqapiksellik əsas kamera var.
Üç fərqli rəng variantında təqdim edilən Honor 600S 5G təxminən 255 dollar başlanğıc qiyməti ilə satışa çıxarılacaq.
Beləliklə, böyük batareya, davamlı korpus və süni intellekt funksiyalarını nisbətən münasib qiymətə təqdim edən yeni model orta seqmentdə rəqabəti daha da qızışdıra bilər.
Bəsti Rəfizadə
