Son 5 ildə Azərbaycanda orta aylıq əməkhaqqının məbləği 47,1 faiz artıb.

Sfera.az xatırladır ki, 2019-cu ilin sonunda 635 manat olan orta maaş məbləği 2023-cü ilin sonunda 934 manata yüksəlib. Əməkhaqqındakı belə yüksək artıma baxmayaraq, bəzi ərzaq məhsulları üzrə inflyasiyanın yüksək olması orta əməkhaqqının alıcılıq qabiliyyətini azaldıb.

Başqa sözlə, son 5 ildə orta əməkhaqqının nominal dəyəri xeyli yüksəlsə də onun alıcılıq qabiliyyəti yüksəlməyib. Bunu Bakı Araşdırmalar İnstitutuun (BAİ) rəsmi statistik məlumatlar əsasında apardığı müqayisədən də görmək olur.

2019-cu ildə orta əməkhaqqı ilə 738,7 kq pomidor almaq mümkün idi. 2023-cü ildə orta maaşla alına bilən pomidorun miqdarı 657,6 kq-a düşüb. Orta maaşın alıcılıq qabiliyyətinin azalması kartof, baş soğan, göy lobya və digər bəzi ərzaq məhsullarında da özünü göstərir. Beş il əvvəl orta əməkhaqqı ilə 765 kq kartof, yaxud 1008 kq baş soğan və ya 457 kq göy lobya almaq olardı. 2023-cü ilin sonunda bu maaşla 759 kq kartof, 857 kq baş soğan, yaxud 338 kq göy lobya almaq imkanı var idi.

Emal olunmuş qida məhsullarının bəziləri üzrə də orta əməkhaqqının alıcılıq qabiliyyəti zəifləyib. Beş il əvvəl orta əməkhaqqı ilə 567 kq şəkər, yaxud 221 litr günəbaxan yağı, yaxud 148 litr qarğıdalı yağı və ya 552 kq çörək almaq olurdu. Ötən ilin sonunda orta əməkhaqqı şəkər tozundan 494 kq, yaxud günəbaxan yağından 180 litr, eynilə qarğıdalı yağından 134 litr və ya çovdar çörəyindən 459 kq almağa imkan verib. Bu məhsullar üzrə alıcılığın azalmasının əsas səbəbi həmin məhsullarda qiymətlərin çox artmasıdır.

Son 5 ildə xüsusən tərəvəzlərin qiymətində çox böyük artım qeydə alınıb ki, bu da pulun alıcılıq qabiliyyətini zəiflədib.

Vasif