Əhali ən çox pulu bu xidmətlərə XƏRCLƏYİR – ADLAR
Azərbaycan əhalisi hər il pullu xidmətlərə milyardlarla manat məbləğində pul xərcləyir. Açıqlanan rəsmi statistik məlumatlardan görünür ki, əhalinin xidmətlərə xərclədiyi pulun çox hissəsi cəmi bir neçə xidmətə sərf edilir.
Sfera.az xəbər verir ki, əhali ən çox pulu rabitə, kommunal və nəqliyyat xidmətlərinə xərcləyir.
2023-cü ilin məlumatına əsasən, rabitə xidmətlərinə 2,52 milyard manat, kommunal xidmətlərə 2,29 milyard manat, nəqliyyat xidmətlərinə isə 1,986 milyard manat ayrılıb. Adıçəkilən 3 xidmət növü üzrə 6,8 milyard manat xərclənib. Üç sahəyə xərclənən məbləğ cəmi xərclərin 60 faizini təşkil edir.
Ötən il əhali pullu xidmətlərə 11,41 milyard manat xərcləmişdi. Orta hesabla hər bir Azərbaycan sakini il ərzində pullu xidmətlərə 1 124 manat xərcləyib. Bunun 248 manatı rabitə, 226 manatı kommunal, 196 manatı nəqliyyat, 124 manatı məişət, 94 manatı təhsil, 93 manatı səhiyyə xidmətlərinin əldə edilməsinə ayrılıb.
Əhalinin xidmətlər arasında ən az pul xərclədiyi sahə isə idman və mədəniyyət xidmətləridir.
Ötən il adambaşına idmana 5,3 manat, mədəniyyət xidmətlərinə 7,2 manat xərclənib.
Vasif
