Bu ölkənin 160 milyard dollarlıq QIZILI VAR
Çin Mərkəzi Bankının qızıl ehtiyatları martın sonunda 72,74 milyon troya unsiyaya (2 262 ton) yüksəlib.
Sfera.az xəbər verir ki, bununla bağlı məlumatı Çin Xalq Bankı açıqlayıb.
Məlumatlardan aydın olur ki, Çin dövlətinin qızıl ehtiyatları ardıcıl 17 ay artıb. Yalnız martda ehtiyatlar 160 min troya unsiya (4,976 ton) artıb.
Hazırda beynəlxalq birjalarda 1 troya unsiya qızılın 2360 dollardan satıldığını nəzərə alsaq, Çinin sahib olduğu qızılın bazar dəyərinin təxminən 160 milyard dollar olduğu məlum olur.
Çinin qızıl ehtiyatını artırması valyuta ehtiyatlarını optimallaşdırmaq və diversifikasiya etmək səylərini göstərir. Müşahidəçilər və ekspertlər qızıl aktivlərinin artımını Mərkəzi Bankın bu ənənəvi aktivə inamı və dünya bazarlarında qeyri-müəyyənliyin olması ilə əlaqələndirir. Çin sabitliyə daha çox önəm verdiyindən qızılda olan yığımlarını artırır.
Şanxay Universitetinin Maliyyə və İqtisadiyyat professoru Xi Junyangın fikrincə isə Çinin qızıl ehtiyatlarını artırmasının əsas səbəbi beynəlxalq valyutaların etibarsızlığıdır. Onun sözlərinə görə, ABŞ dollarının məzənnəsi daim dəyişir və bu, xarici valyutadan asılı olan iqtisadiyyatlara təsir edir.
Vasif
