Finalçılar bəlli oldu: Dünya çempionu kim olacaq? - Proqnoz
2026-cı il futbol üzrə dünya çempionatında finalın iştirakçıları müəyyənləşib. Həlledici qarşılaşmada İspaniya və Argentina üz-üzə gələcək. Futbol ictimaiyyətində əsas müzakirə mövzusu isə mundialın qalibinin hansı komanda olacağıdır.
Sfera.az xəbər verir ki, bukmeker kontorlarının açıqladığı son əmsallara əsasən, finalın favoriti İspaniya hesab olunur.
Bir çox beynəlxalq mərc şirkəti İspaniyanın qələbə ehtimalını Argentinadan daha yüksək qiymətləndirir.
Mütəxəssislərin fikrincə, İspaniyanın favorit göstərilməsinin əsas səbəbləri komandanın turnir ərzində nümayiş etdirdiyi sabit oyun, güclü müdafiə xətti və topa nəzarətdə üstünlüyüdür. İspaniya yarımfinalda Fransa millisini 2:0 hesabı ilə məğlub edərək finala yüksəlib və indiyədək cəmi bir qol buraxıb.
Argentina isə finala daha çətin yolla və dramatik qarşılaşmalar nəticəsində çıxıb. Lionel Messinin liderliyi ilə çıxış edən komanda pley-off mərhələsində bir neçə gərgin oyundan qalib ayrılaraq həlledici matça vəsiqə qazanıb. Təcrübə və böyük oyunlarda göstərdiyi xarakter Argentinanın əsas üstünlükləri hesab edilir.
Bukmekerlərin son əmsallarına görə, İspaniyanın dünya çempionu olma ehtimalı daha yüksək qiymətləndirilib. Bununla belə, ekspertlər Messili Argentinanın sürpriz etmə potensialını da istisna etmirlər və finalın bərabər səviyyəli, gərgin mübarizə şəraitində keçəcəyini bildiriblər.
Bəsti Rəfizadə