ABŞ-də süni intellektlə bağlı yeni addım: Tramp şirkətləri topladı
ABŞ Prezidenti Donald Tramp texnologiya şirkətlərinin rəhbərlərinin süni intellektlə bağlı könüllü standartlar müəyyənləşdirməyə razılaşdıqlarını açıqlayıb.
Sfera.az xəbər verir ki, Tramp bunu texnologiya şirkətlərinin rəhbərləri ilə Ağ Evdə keçirdiyi görüşdən sonra bildirib.
Razılaşmaya əsasən, şirkətlər süni intellekt sistemlərinin yaradıcılarının nəzərdə tutduğu kimi işləyib-işləmədiyini qiymətləndirmək üçün “müstəqil auditorlar”la əməkdaşlıq edəcəklər. Şirkətlər həmçinin süni intellekt alətlərinin texniki sistemlərə nəzərdə tutulmayan şəkildə müdaxilə etməsinin və ya onlara giriş əldə etməsinin qarşısını almaq üçün tədbirlər görəcəklər.
ABŞ administrasiyası süni intellektin yaratdığı risklərlə bağlı artan təzyiqlə üzləşir. Buna səbəb “OpenAI” və “Anthropic” şirkətlərinin süni intellekt agentlərinin nəzarətdən çıxaraq digər şirkətlərin sistemlərinə müdaxilə etməsi ilə bağlı məlumatların yayılmasıdır.
Tramp süni intellekt modellərinin hazırlanması və işlədilməsi üçün vacib olan məlumat mərkəzlərinin sürətli şəkildə genişləndirilməsini dəstəklədiyini bir daha vurğulayıb. Bununla belə, ABŞ-ın müxtəlif bölgələrində məlumat mərkəzlərinin tikintisinə qarşı narazılıq artır. Sakinlər əsasən elektrik enerjisinə tələbatın artması, kommunal xərclər və digər yerli təsirlərdən narahatdırlar.
“Bu, müəyyən mənada konstitusiyaya bənzəyir. Dünyanın ən böyük şirkətləri bunu imzalayıb və mən də prezident kimi imzalamışam. Bu, həqiqətən də bir müdafiə vasitəsidir”, – Tramp deyib.
Görüşdə “OpenAI”nin rəhbəri Qreq Brokman, “Anthropic” şirkətinin rəhbəri Dario Amodei, “Meta”nın rəhbəri Mark Zukerberq, “Google”un rəhbəri Sundar Piçai və “Nvidia”nın rəhbəri Jensen Huang da iştirak ediblər.
Zukerberq şirkətlərin süni intellekt sistemləri üçün “güclü daxili nəzarət mexanizmləri” hazırlamağa razılaşdıqlarını bildirib.
Tramp həmçinin süni intellekt alətlərinin təhlükəsizliyinə nəzarət edəcək 10 nəfərlik şura yaradılmasını nəzərdən keçirdiyini açıqlayıb. O, şuraya kimin daxil ediləcəyini dəqiqləşdirməyib. Prezident Ağ Evin süni intellekt siyasətinə rəhbərlik edəcək yeni vəzifəli şəxsin də yaxın vaxtlarda təyin olunacağını bildirib.
Tramp məlumat mərkəzlərinin tikintisinə dəstəyinin noyabrda keçiriləcək aralıq seçkilərində Respublikaçılar Partiyasına təsir göstərə biləcəyi ilə bağlı suala cavab olaraq texnologiya şirkətlərinin bu layihələrin həyata keçirildiyi icmalar üçün fayda yaradacağını deyib.
“Bu böyük, güclü, çox zəngin və çox ağıllı şirkətlər icmalara böyük töhfələr verəcəklər”, –Tramp bildirib.
Reuters/Ipsos-un sentyabrın 17-20-də keçirdiyi sorğuya əsasən, respondentlərin 73 faizi süni intellekt şirkətlərinin texnologiyanın cəmiyyətə ciddi zərər vurmasının qarşısını almaq üçün kifayət qədər tədbir görmədiyindən narahatdır. Respondentlərin 55 faizi isə süni intellektin inkişafının yavaşladılmasının yaxşı olacağını düşünür.
Tramp həmçinin ABŞ dövlət qurumlarına texnologiyadan bəhs edərkən “süni intellekt” əvəzinə “super intellekt” ifadəsindən istifadə etməyi tapşırıb.
İnci
Sfera.az
