Xəstəxanada, bankda, metroda...- Çin nikah məntəqələrini artırır
Çində azalan nikahların sayını artırmaq və evlənmək istəyən cütlüklər üçün rəsmi prosedurları asanlaşdırmaq məqsədilə nikah qeydiyyatı xidmətləri qeyri-adi məkanlara köçürülür.
Sfera.az xəbər verir ki, ölkənin müxtəlif bölgələrində cütlüklər artıq yalnız rəsmi nikah idarələrində deyil, banklarda, xəstəxanalarda, hava limanlarında, metro stansiyalarında və hətta gecə klublarında nikah qeydiyyatından keçə bilirlər.
Tianjin şəhərinin Hexi rayonunda avqustun 6-da Çində bank daxilində fəaliyyət göstərən ilk nikah qeydiyyatı məntəqəsi açılıb.
Bankda yaradılan xüsusi məntəqədə cütlüklərin nikah qeydiyyatı rəsmi əməkdaşlar tərəfindən həyata keçirilir. Bildirilib ki, bu addım nikah qeydiyyatı xidmətlərinə çıxışı asanlaşdırmaq məqsədi daşıyır.
Ən qeyri-adi nümunələrdən biri Şanxayda tətbiq edilib. Şəhərdəki gecə klublarından biri yerli mülki işlər idarəsi ilə əməkdaşlıq edərək cütlüklər üçün nikah şəhadətnaməsinin təqdimetmə mərasimlərinə ev sahibliyi edib.
Çinin müxtəlif bölgələrində məbədlər, turistik məkanlar, parklar və metro stansiyaları da nikah qeydiyyatı üçün istifadə olunmağa başlayıb.
Şandun əyalətinin Zibo şəhərində yerləşən qadın və uşaq sağlamlığı xəstəxanasında da avqustun 20-dən nikah qeydiyyatı xidməti göstərilməyə başlanılıb.
Quançjou Baiyun Beynəlxalq Hava Limanında isə yanvar ayında nikah qeydiyyatı məntəqəsi açılıb. Bununla da hava limanı Çində nikah şəhadətnaməsinin verildiyi ilk hava limanı olub.
Rəsmi məlumatlara görə, 2026-cı ilin ilk yarısında təxminən 3,28 milyon cütlük nikah qeydiyyatından keçib. Bu, ötən ilin eyni dövrü ilə müqayisədə 7,5 faiz azalma deməkdir.
Eyni dövrdə boşanmaların sayı isə 3,9 faiz artaraq 1,38 milyona çatıb.
Qeyd edək ki, Çin 2025-ci ilin mayında nikah qeydiyyatı qaydalarında da dəyişiklik edib. Yeni qaydalarla cütlüklərin nikah bağlamaq üçün qeydiyyatda olduqları bölgəyə qayıtmaq məcburiyyəti aradan qaldırılıb.
İradə Elsevər
