Yaponiyada demoqrafik böhran getdikcə dərinləşir.

Rəsmi məlumatlara görə, 2024-cü ildə ölkənin əhalisi rekord səviyyədə azalıb. Əhali bir il ərzində 908 min 574 nəfər azalıb ki, bu da Yaponiyanın 1968-ci ildən bəri apardığı statistikalarda qeydə alınan ən böyük azalmadır. Əhali sayındakı azalma ardıcıl 16 ildir ki, davam edir.

Sfera.az xarici mediaya istinadən xəbər verir ki, Baş nazir Şiqeru İşiba vəziyyəti “səssiz fövqəladə vəziyyət” adlandırıb və ölkədə ailə qurmağı və uşaq böyütməyi stimullaşdırmaq məqsədilə daha elastik iş saatları və pulsuz uşaq bağçaları kimi bir sıra tədbirlərin həyata keçiriləcəyini bildirib.

Dünya Bankının məlumatına görə, Yaponiya Monakodan sonra dünyanın ən yaşlı əhalisinə sahib ikinci ölkədir. Hazırda 65 yaşdan yuxarı şəxslər ölkə əhalisinin təxminən 30%-ni təşkil edir. 15-64 yaş arası vətəndaşlar əhalinin 60%-ni əhatə edir. Hər iki qrupda ötən illə müqayisədə cüzi artım müşahidə olunub.
Əcnəbilərin sayı isə artmaqdadır. 2025-ci il yanvarın 1-nə olan göstəriciyə əsasən, Yaponiyada 3,67 milyon əcnəbi yaşayıb. Bu da ümumi əhalinin təxminən 3%-ni təşkil edir.

Əhalinin azalması, xüsusilə kənd və ucqar bölgələrdə ciddi sosial və iqtisadi nəticələrə yol açır. Hökumətin yaydığı məlumata görə, ölkədə tərk edilmiş evlərin sayı 4 milyona yaxınlaşır. Bu evlərin əksəriyyəti böyük şəhərlərdə yaşayan və miras yolu ilə əmlak əldə etmiş şəxslərə məxsusdur. Lakin həmin şəxslər ya bu evləri bərpa etməkdə çətinlik çəkirlər, ya da buna maraq göstərmirlər.

Mütəxəssislər bildirirlər ki, əgər bu tendensiya davam edərsə, Yaponiyanı yaxın onilliklərdə daha böyük sosial və iqtisadi çətinliklər gözləyir.

Bəsti Rəfizadə
Sfera.az

Yaponiyada səssiz böhran: Əhali azalır, 4 milyon ev boşdur