Mask Trampa 15 milyon dollarlıq dəstək verib

ABŞ-li milyarder iş adamı İlon Mask, aralarındakı gərginliyə və keçmişdəki qarşıdurmalara baxmayaraq, prezident Donald Tramp və Respublikaçılara iyun ayında ümumilikdə 15 milyon dollar pul verib.

Sfera.az xəbər verir ki, “Politico” nəşrinin Federal Seçki Komissiyasının məlumatlarına istinadən yaydığı xəbərə görə, “Tesla” və “SpaceX”in rəhbəri İlon Mask, Trampın seçki kampaniyası olan MAGA hərəkatına iyun ayında 5 milyon dollar maliyyə yardımı edib.

Bundan əlavə, Mask iyunun 27-də Respublikaçıların Konqresdəki mövqeyini gücləndirmək üçün yaradılmış Konqres Liderliyi Fondu və Senat Liderliyi Fonduna da hər birinə 5 milyon dollar olmaqla daha 10 milyon dollar bağışlayıb.

Xəbərdə qeyd olunub ki, bu fondlar həm Konqresdə Respublikaçıların gücünü artırmaq, həm də Trampın siyasi fəaliyyətlərini dəstəkləmək baxımından mühüm əhəmiyyətə malikdir. Maraqlıdır ki, Mask bu köməklərdən cəmi bir həftə sonra öz siyasi partiyasını quracağını açıqlayıb.

Hazırda bu təşkilatlardan heç biri məsələyə dair rəsmi açıqlama verməyib.

Bəsti Rəfizadə
Sfera.az