Avstraliya hökuməti, 16 yaşdan aşağı uşaqlara sosial media hesabı açmağı qadağan edən yeni qanun layihəsinə “YouTube” platformasını da əlavə edib. Daha əvvəl platformanın bu qadağadan azad olacağı açıqlansa da, sonradan qərar dəyişdirilib.

Sfera.az xarici mediaya istinadən xəbər verir ki, yeni qanuna əsasən, 2024-cü ilin dekabr ayından etibarən “TikTok”, “Instagram”, “Facebook”, “X” və “Snapchat”lə yanaşı, “YouTube”da da 16 yaşdan aşağı şəxslərin hesab yaratmasına icazə verilməyəcək.

Uşaqlar videoları izləməyə davam edə biləcəklər, lakin platformada video yükləmək və digər funksiyalardan istifadə üçün hesab aça bilməyəcəklər.

“YouTube”un sahibi olan “Google” şirkəti məsələ ilə bağlı açıqlamasında platformanın uşaqlara “fayda və dəyər” verdiyini bildirərək, onu sosial media kimi qiymətləndirməməyə çağırıb.

Baş nazir Entoni Albanese qərarı müdafiə edərək bildirib ki, sosial media uşaqlara sosial zərər vurur və hökumət valideynlərin yanında olduğunu göstərmək üçün bu addımı atıb:

“Bu qadağa yeganə həll yolu olmasa da, mühüm fərq yaradacaq”.

Yeni qaydalar mesajlaşma tətbiqləri, onlayn oyunlar, təhsil və sağlamlıq sahəsindəki tətbiqlərə şamil olunmur. Bu platformaların 16 yaşdan aşağı şəxslər üçün daha az təhlükəli olduğu bildirilir.

Qanuna əsasən, texnologiya şirkətləri yaş məhdudiyyətlərini pozduqları təqdirdə 50 milyon Avstraliya dollarına qədər cərimə oluna bilərlər. Şirkətlər həmçinin mövcud gənc istifadəçi hesablarını silməli, yeni hesabların yaradılmasının qarşısını almalı və sistem boşluqlarını aradan qaldırmalıdırlar.

Bəsti Rəfizadə
Sfera.az

Bu ölkədə uşaqlar “YouTube” hesabı aça bilməyəcəklər - Qadağa