İran iddiaları rədd etdi: “Tehran danışıqlarda iştirak etmir”
İran Xarici İşlər Nazirliyi ABŞ Prezidenti Donald Trampın Qəzza ilə bağlı atəşkəs danışıqlarında Tehran rəhbərliyinin iştirak etdiyinə dair səsləndirdiyi iddialara münasibət bildirib.
Sfera.az xarici mediaya istinadən xəbər verir ki, nazirliyin sözçüsü İsmayıl Bəkayi rəsmi IRNA agentliyinə verdiyi açıqlamada Trampın iddialarını qəti şəkildə təkzib edib.
O vurğulayıb ki, HƏMAS müzakirələrdə üçüncü tərəflərin müdaxiləsinə ehtiyac duymur və İran tərəfi olaraq yalnız Qəzza xalqının əzabını yüngülləşdirəcək və İsrailin törətdiyi cinayətləri dayandıracaq prosesləri dəstəklədiklərini bildirib.
Xatırladaq ki, Tramp dünən Şotlandiyada Britaniyanın Baş naziri Keir Starmer ilə görüşü zamanı jurnalistlərin suallarını cavablandırarkən belə deyib:
“Fikrimcə, onlar (İran) bu danışıqlara müdaxilə ediblər. HƏMAS-a siqnallar və təlimatlar göndərirlər. Bu, yaxşı bir şey deyil”.
Tehran isə bu açıqlamaların əsassız olduğunu bildirərək, Qəzza ilə bağlı atəşkəs prosesində birbaşa iştirak etmədiyini bəyan edib.
Bəsti Rəfizadə
Sfera.az
