Putin güzəşt etmir - Hər şey 12 gündən sonra bilinəcək

ABŞ Prezidenti Donald Tramp Ukrayna münaqişəsinin nizamlanması üçün Rusiyaya verdiyi müddəti azaltmaq qərarına gəlib. Tramp Rusiyaya verdiyi möhləti 50 gündən 10-12 günə endirib. 

Bəs bu müddət bitəndən sonra ABŞ həm iqtisadi, həm də hərbi cəhətdən Rusiyaya nə edə bilər?

Mövzu ilə bağlıl Sfera.az-a açıqlama verən siyasi şərhçi Kənan Novruzovun sözlərinə görə, Tramp prezidentliyinin əvvəlində Rusiyaya qarşı olduqca loyal münasibət sərgiləyib, hətta onun Putinə yaxınlığı barədə iddialar da səsləndirilib:

“Tramp ikinci dəfə prezident olanda ABŞ-nin Rusiyaya qarşı münasibəti inanılmaz dərəcədə loyal idi. Hətta o vaxt iddia edirdilər ki, Tramp cavanlıqda Putinlə birlikdə agent olub. Trampın məqsədi isə Ukrayna ilə Rusiyanı güzəştə getməsini təmin etmək idi. Ukrayna hazır olsa da, Rusiyanın addım atmaması stol arxasına oturmağa mane oldu. Tramp Putinlə son telefon danışığından sonra narazılığını ifadə etdi və bildirdi ki, Putin müharibəni sona qədər davam etdirməklə insanları öldürməkdə israrlıdır”.

Novruzov qeyd edir ki, Trampın bu mövqeyi dəyişməsi, Rusiya tərəfindən heç bir güzəştin edilməməsi ilə əlaqədardır:

“Dünən Tramp açıqlamasında Putinlə danışıqda maraqlı olmadığını bildirdi. Görünür ki, Rusiyanın heç bir güzəştə getmək fikri yoxdur. Bu da başa düşüləndir çünki Putin hazırda hakimiyyətini müharibə hesabına təmin edir. Bir çox dövlət tərəfindən cinayətkar kimi tanınır, həbs olunma ehtimalı var. Hansısa güzəştə getsə, xalq onu bağışlamayacaq. Digər tərəfdən, üstünlük də ondadır. Strateji olmasa da, taktiki baxımdan 1-2 həftədən bir hansısa ərazini tutur, uğurlar əldə edir. Tramp da Putinin güzəştə getməyəcəyini anladığı  an təzyiqə başladı. Telefon danışığından sonra sanksiyalar məsələsinin də aktualaşması buna sübutdur. Tramp artıq Putini açıq-aydın hədələyir. ABŞ liderinin əvvəlki Rusiyaya qarşı loyal münasibəti Avropanın narazılığına səbəb olmuşdu. Amerika tərəfləri bir araya gətirməyə çalışdıqca Avropa da bir tərəfdən Ukraynanı silahlandırırdı. Avropa müharibənin bitməsini istəmir çünki belə olan halda Rusiya qonşu Avropa ölkələr üçün təhdid yaratmağa başlayacaq. Rusiya da bunlara adekvat cavab verir ki, bu da müharibənin bitməsinin qarşısını alır. Tramp artıq etdiklərinin nəticə vermədiyini anladığı üçün Rusiyaya qarşı mövqeyini dəyişmək qərarını aldı”. 

Siyasi şərhçiyə görə, qarşıdakı 12 gün ərzində ciddi dəyişikliklər gözlənilmir:

“Bu vaxta qədər nə olubsa, o da olub. Buna görə də 12 gündən sonra da böyük dəyişiklik baş verməyəcək. Gözlənilən yenə sankiyaların tətbiqidir. Rusiya isə sanksiyalara öyrəşib artıq. ABŞ Ukraynanı silahlandıra bilər ki, bu da dünya müharibəsi ehtimalını yenidən aktuallaşdıracaq. Putini əsəbiləşdirdikcə nüvə silahı məsələsini yenidən gündəmə gətirəcək. İndiki vəziyyət elədir ki, müharibənin bitmə ehtimalı genişlənməsindən daha azdır. Hər an Rusiya ona qonşu növbəti ölkəyə keçə bilər və ya Rusiyaya qarşı yeni bir cəbhə açıla bilər”. 

Firuzə Əliyeva
Sfera.az