Rusiya və Ukrayna liderləri görüşəcək? - "Bu barədə danışmağa başlayıblar"
İstanbulda Rusiya və Ukrayna nümayəndə heyətləri arasında keçirilən görüş zamanı Rusiya Prezidenti Vladimir Putinlə Ukrayna lideri Volodimir Zelenski arasında mümkün görüş məsələsi müzakirə olunub.
Sfera.az “Gazeta.ru” nəşrinə istinadən xəbər verir ki, bu barədə Ukrayna Prezidenti Volodimir Zelenski məlumat verib.
“Biz həmişə açıq şəkildə liderlər səviyyəsində görüş məsələsini qaldırırıq. Onlar indi bizimlə bu barədə danışmağa başlayıblar. Bu, artıq hansısa görüş formatına doğru addımdır”, – deyə Zelenski bildirib.
Qeyd edək ki, iyulun 23-də İstanbulda keçirilən üçüncü danışıqlar raundu çərçivəsində tərəflər “1200-dən 1200-ə” düsturuna əsaslanan məhbus mübadiləsi barədə razılığa gəliblər. Eyni zamanda, Rusiya növbəti məsləhətləşmələr üçün üç işçi qrupunun yaradılmasını təklif edib.
Rusiya nümayəndə heyətinin rəhbəri Vladimir Medinski bildirib ki, memorandum layihəsi ilə bağlı tərəflərin mövqeləri hələ də ciddi şəkildə fərqlənir.
Fidan Hacızadə
Sfera.az
