ABŞ-İran görüşü hansı tarixdə reallaşacaq? - AÇIQLAMA
“İran və ABŞ arasında nüvə sazişi üzrə danışıqların növbəti raundunun vaxtı və yeri ilə bağlı hələlik razılıq əldə olunmayıb”.
Sfera.az xarici mediaya istinadən xəbər verir ki, bunu İran Xarici İşlər Nazirliyinin sözçüsü İsmail Bəqayi bildirib.
“Hələlik bu məsələ ilə bağlı heç bir tarix, vaxt və ya yer təyin edilməyib”,– deyə o, həftəlik brifinqdə açıqlama verib.
Diplomatın sözlərinə görə, Tehran yalnız diplomatik səylərin və danışıqlar prosesinin effektivliyinə əmin olduqdan sonra danışıqlar masasına qayıtmağı planlaşdırır.
Qeyd edək ki, İran və ABŞ apreldən bəri Omanın vasitəçiliyi ilə İranın nüvə proqramı ətrafında vəziyyətin həlli üçün dolayı danışıqlar aparır. Lakin bir neçə cəhddən sonra uranın zənginləşdirilməsi məsələsində mövcud fikir ayrılıqları danışıqların gedişini çətinləşdirib.
Danışıqların altıncı raundu iyunun 15-də Maskatda keçirilməli idi, lakin İsrailin bölgədə həyata keçirdiyi zərbələrdən sonra proses dayandırılıb.
Fidan Hacızadə
Sfera.az
