Türkiyədə virus yayılır - Qadağa qüvvəyə mindi

Türkiyə xəstə heyvanların ətindən yoluxa bilən dabaq xəstəliyinin yayılması səbəbilə ölkədə bütün mal-qara bazarlarını müvəqqəti bağlamaq qərarına gəlib. 

Sfera.az bildirir ki, bu barədə İHA xəbər agentliyi məlumat yayıb.

Türkiyənin Kənd Təsərrüfatı və Meşə Təsərrüfatı Nazirliyi yanında Qida Məhsullarına Nəzarət Baş İdarəsi Qurban bayramından sonra virusa yoluxma hallarının artması ilə bağlı 81 əyalətdəki bütün şöbələrə təcili göstəriş göndərib.

Qurumun açıqlamasında bildirilib ki, dabaq xəstəliyi aşkarlanan bölgələrdə karantin rejimi tətbiq olunub və virusun yayılmasının qarşısını almaq məqsədilə qısa müddətdə bütün heyvanları peyvənd etmək mümkün deyil.

“Əyalətinizdə fəaliyyət göstərən bütün pərakəndə satış məntəqələrinin növbəti xəbərdarlığa qədər dərhal bağlanmasını xahiş edirik, çünki heyvanların və ziyarətçilərin yüksək səviyyəli hərəkəti xəstəliyin yayılma riskini artırır”,– deyə idarənin açıqlamasında qeyd olunub.

Fidan Hacızadə
Sfera.az