ABŞ Müdafiə Nazirliyi (Pentaqon) İranın Fordo Nüvə Təsisinə endirilən zərbəyə dair görüntülər yayıb.

Sfera.az “Sözcü”yə istinadən xəbər verir ki, rəsmi açıqlamaya görə, İran tərəfi hücumdan öncə obyektin havalandırma bacalarını betonla bağlayaraq mühafizə etməyə çalışsa da, ABŞ bu maneəni aşaraq hədəfi iki mərhələli hücumla vurub.

Müdafiə naziri Pit Heqsetvə ABŞ Baş Qərargah rəisi Dan Keyn Pentaqonda keçirdikləri mətbuat konfransında hücumla bağlı detalları ictimaiyyətlə bölüşüblər. Keynin sözlərinə görə, ilk bomba beton qapağı dağıdıb, ardınca ikinci bombayla əsas hədəf məhv edilib. Hegseth medianı “uğurlu əməliyyatı uğursuz kimi göstərməkdə” ittiham edib və bəzi məlumatların məqsədli şəkildə sızdırıldığını deyib.

“Əgər Fordoda nə baş verdiyini bilmək istəyirsinizsə, ora kürəklə getsəniz daha yaxşı olar”, – deyə Heqset bildirib.

Mətbuat konfransında “Gecə yarısı çəkici” adlandırılan əməliyyatın xəritəsi təqdim olunub və hücum anlarını əks etdirən videolar nümayiş etdirilib. Nazir hücumun İranın nüvə proqramını ciddi şəkildə geriyə atdığını və 12 günlük münaqişəni sona çatdırdığını vurğulayıb.

ABŞ Prezidenti Donald Tramp da sosial şəbəkədə açıqlama yayaraq, Fordodan heç bir nüvə materialının çıxarılmadığını, orada yalnız beton tökən işçilərə məxsus nəqliyyat vasitələrinin olduğunu bildirib.

Bununla belə, “Financial Times” qəzeti Avropa istihbaratına istinadən İranın hücumdan əvvəl zənginləşdirilmiş uranı Fordodan çıxardığını yazıb.

ABŞ Baş Qərargah rəisi Dan Keyn isə İranın ABŞ-nin Qətərdəki “Əl-Udeyd” bazasına raket hücumuna cavab olaraq həyata keçirilən bu əməliyyatda ABŞ hərbi tarixində ən çox “Patriot” raketindən istifadə olunduğunu açıqlayıb. O da təsdiqləyib ki, Fordoya atılan bütün bombalar hədəfə dəyib.

Bəsti Rəfizadə
Sfera.az

Pentaqon “Fordo” hücumunun görüntülərini yayımladı - VİDEO