Keçmiş CIA direktoru və ehtiyatda olan general David Petraeus, Londonda fəaliyyət göstərən “Policy Exchange” beyin mərkəzində çıxışı zamanı Rusiya Prezidenti Vladimir Putinin Ukrayna müharibəsində uğur qazanacağı təqdirdə növbəti hədəfinin NATO üzvü olan Avropa ölkələri ola biləcəyini bildirib. O, xüsusilə Baltikyanı ölkələrdən Litviyanı təhlükə altında görür və qeyd edir ki, Kreml bu addımı Qərbin mövqeyini sınamaq və ya daha genişmiqyaslı hücumların başlanğıcı kimi ata bilər.

Sfera.az xarici medaiya istinadən xəbər verir ki, Petraeus Putinin əsas məqsədinin Ukrayna Prezidenti Volodimir Zelenskini devirmək, ölkədə Moskvaya sadiq bir rejim qurmaq və Ukraynanın tam nəzarət altına alınması olduğunu vurğulayıb.

Onun fikrincə, bu planın uğur qazanması Baltikyanı ölkələrə birbaşa təhlükə yaradır.

General ABŞ-nin keçmiş prezidenti Co Baydeni Ukraynaya hərbi yardım məsələsində gecikmələrə yol verdiyinə görə də tənqid edib. O, “F-16” döyüş təyyarələrinin və “M1 Abrams” tanklarının Ukraynaya göndərilməsinin çox gec baş tutduğunu və bu gecikmələrin Ukraynanın müdafiə qabiliyyətinə mənfi təsir etdiyini bildirib.

Bununla yanaşı, Petraeus Donald Trampı da sərt ifadələrlə tənqid edərək, onu Putinlə danışıqlarda davamlı olaraq ikinci şans verməkdə ittiham edib. Onun sözlərinə görə, bu yanaşma Qərbin mövqeyini zəiflədir və Putinə daha geniş manevr imkanları yaradır.

Petraeus Ukraynanın Moskvaya əlavə ərazi qazancının mümkün olmadığını göstərməsi üçün Qərbin daha ciddi və güclü dəstək verməsinin vacibliyini vurğulayıb. O əlavə edib ki, Rusiya rəhbərliyi barış danışıqlarını bilərəkdən ləngidir, çünki əlavə Ukrayna torpaqları əldə etmək niyyətindədir.

Bəsti Rəfizadə
Sfera.az

Keçmiş CIA direktoru: Putin dayanmayacaq, bu ölkələrə hücum edəcək