Qətərin ABŞ Prezidenti Donald Trampa 400 milyon dollar dəyərində “Boeing 747-8” tipli dəbdəbəli təyyarə hədiyyə etməsi Amerika ictimaiyyətində və siyasi dairələrdə ciddi qalmaqala səbəb olub. Təyyarə “Boeing”in rəsmi prezident təyyarəsinin təhvilində yaşanan gecikməyə görə, müvəqqəti olaraq istifadə olunacaq.

Sfera.az “NTV”yə istinadən xəbər verir ki, “Göydəki Saray” kimi tanınan bu modelin Trampa təqdim olunması həm hüquqi, həm də etik mübahisələrə yol açıb.

ABŞ Konstitusiyası hökumət rəsmilərinə xarici dövlətlərdən hədiyyə qəbul etməyi qadağan etdiyindən, bir çox hüquqşünas və siyasətçi bu addımı qanunsuz xarici hədiyə kimi qiymətləndirir.

Respublikaçılar Partiyasının nüfuzlu üzvləri də bu qərara sərt reaksiya veriblər. Respublikaçı siyasətçi Nikki Haley sosial şəbəkədə paylaşım edərək bildirib:

“Əgər bu hədiyyə Baydenə verilsəydi, hər kəs hiddətlənərdi”.

Qətərin Baş naziri Şeyx Məhəmməd bin Əbdürrəhman Al Sani “CNN”ə açıqlamasında məsələni aydınlaşdıraraq bildirib ki, bu, şəxsi deyil, hökumətlərarası razılaşmadır və Müdafiə Nazirlikləri çərçivəsində aparılan əməkdaşlığa aiddir. O, hədiyyənin hələ də hüquqi təhlil mərhələsində olduğunu əlavə edib.

Hadisənin ictimailəşməsindən sonra Tramp tənqidçilərinə “axmaq” deyə cavab verərək onları sərt şəkildə ittiham edib:

"Belə bir təyyarə ödənişsiz əldə oluna biləcəyi halda niyə bundan istifadə etməyək. Bu hədiyyəni qəbul etməsək, onda vergi ödəyicilərinin verdiyi yüz milyonlarla dollarlıq vəsaitlə başqa təyyarı alınmalıdır".

Bu qalmaqalla eyni vaxtda “Boeing” şirkəti Qətərlə 160 təyyarənin satışı üçün 200 milyard dollar dəyərində tarixi müqavilə imzalayıb. Ağ Ev bu razılaşmanı elan edərkən Donald Trampı “baş müqavilə bağlayıcı” kimi təqdim edib. Razılaşmanın xəbəri “Boeing”in səhmlərində də artıma səbəb olub.

Bu hadisə ABŞ siyasətində xarici təsirlər, etik qaydalar və milli maraqlar mövzusunda yenidən müzakirələrin başlamasına səbəb olub.

Bəsti Rəfizadə
Sfera.az

Trampa təyyarə hədiyəsi qalmaqal yaradıb: "Bu, etik deyil"