Cənubi Asiyada vəziyyət gərginləşir - İki nüvə dövləti qarşı-qarşıyadır
Cənubi Asiyada gərginlik kritik həddə çatıb. Hindistan və Pakistan arasında gərginlik hərbi qarşıdurma mərhələsinə keçib. Nüvə silahına sahib iki ölkə arasında baş verən bu qarşıdurma təkcə sərhəd toqquşması deyil, həm də regional və qlobal təhlükəsizlik üçün ciddi təhlükə kimi qiymətləndirilir.
Müharibənin ilk saatlarında həm hava, həm də quru sərhədlərində silahlı qarşıdurmaların baş verdiyi bildirilir. Regionda yaşayan mülki əhalinin təxliyəsi ilə bağlı xəbərdarlıqlar səsləndirilib.
Münaqişənin mümkün miqyası və nəticələri ilə bağlı Sfera.az-a açıqlama verən politoloq Tural İsmayılov bildirib ki, bölgədə sabitliyi pozan əsas amillərdən biri Hindistanın adekvat olmayan siyasət nümayiş etdirməsidir. Onun sözlərinə görə, Pakistan daim məsuliyyətli bir aktor kimi çıxış edir və diplomatik həll yollarını dəstəkləyir.
T.İsmayılov vurğulayıb ki, Kəşmir məsələsində Pakistanın mövqeyi beynəlxalq hüquqa və BMT qətnamələrinə əsaslanır.
O, Hindistanın Kəşmirin xüsusi statusunu ləğv etməsinin regionda gərginliyi daha da artırdığını bildirib:
“Pakistan bu addımı beynəlxalq ictimaiyyətin diqqətinə çatdırmaq üçün ardıcıl şəkildə diplomatik fəaliyyət göstərib. İslamabad bölgədə sülhün bərqərar olunması üçün bir neçə dəfə dialoq təklif etsə də, Hindistan bu çağırışlara biganə qalıb”.
Politoloq əlavə edib ki, Pakistan ordusu öz sərhədlərini müdafiə etməklə yanaşı, regionda sabitliyin pozulmaması üçün maksimal təmkin göstərir:
“Hindistanın təxribat xarakterli hərbi manevrləri bölgədə balansı pozur və silahlanma yarışını qızışdırır, Pakistan isə əksinə, müdafiə yönümlü siyasəti ilə daha çox sülh tərəfdarı olduğunu sübut edir”.
Politoloq vurğulayıb ki, Hindistanın apardığı təbliğatla Pakistanı hədəfə alması konstruktiv münasibətlərin qurulmasına mane olur. “Pakistan isə bu təbliğat savaşına qarşı daha çox diplomatik və sivil metodlarla cavab verir. Hindistan mediasının təhrikedici mövqeyi iki ölkə xalqları arasında düşmənçilik toxumu səpir. Pakistan xalqı isə qarşı tərəfdəki insanlara qarşı düşmənçilik deyil, ədalətli münasibət istəyir”, – deyə o bildirib.
T.İsmayılov regionda sülhün yalnız qarşılıqlı hörmət və beynəlxalq hüquq normalarına əməl etməklə mümkün olduğunu deyib. O əlavə edib ki, Pakistan bu prinsipə sadiq qalaraq gərginliklərin danışıqlar yolu ilə həllini dəstəkləyir: "Hindistanın regional ambisiyaları və hegemonluq iddiaları Cənubi Asiyada ciddi təhlükə mənbəyidir. Pakistan balanslı və çoxtərəfli əməkdaşlıq modelini irəli sürür. Bu model sülhə, sabitliyə və inkişaf edən regiona aparan yeganə yol kimi görünür. Ədalət, bərabərlik və dialoq prinsiplərinə sadiq Pakistan beynəlxalq ictimaiyyətin dəstəkləməli olduğu mövqe sərgiləyir”.
Müharibənin genişlənməsi ehtimalına toxunan politoloq bildirib ki, əgər Hindistan və Pakistan arasında müharibə qısa müddətdə dayandırılmasa, bu, sadəcə iki ölkənin deyil, bütün Cənubi Asiyanın təhlükəsizliyinə birbaşa təhdid olacaq. Onun fikrincə, hər iki ölkənin nüvə silahına sahib olması vəziyyəti son dərəcə riskli və qeyri-müəyyən edir:
"Bu münaqişə təkcə Kəşmir bölgəsiylə məhdudlaşmaya, eyni zamanda sərhədyanı ərazilərə, hava və dəniz qüvvələrinə də yayılaraq miqyasını genişləndirə bilər”.
Bəsti Rəfizadə
Sfera.az
