Braziliya polisi terror aktına cəhddə şübhəli bilinən şəxsləri həbs edib.

Sfera.az bildirir ki, polis Rio-de-Janeyrodakı Kopakabana çimərliyində “Saxta canavar” əməliyyatı keçirib. Əməliyyat zamanı Ledi Qaqanın konserti zamanı terror aktı planlaşdıran şəxslər saxlanılıb. Polislər partlayıcı maddələr və molotov kokteyli müsadirə edərək hadisəni törədənləri həbs edib.

Bu barədə Braziliya hüquq-mühafizə orqanlarının bəyanatında məlumat verilib.

"Braziliya polisi Ədliyyə Nazirliyi ilə birlikdə Ledi Qaqanın Rio-de-Janeyrodakı Kopakabana çimərliyində konserti zamanı həyata keçirilməsi planlaşdırılan partlayışın qarşısını alıb" - deyə polis bildirib.

Hüquq-mühafizə orqanları əlavə edir ki, onlar iki nəfəri - kişi təşkilatçı və cinayətə adamların cəlb edilməsində iştirak edən azyaşlını saxlayıblar. Polislər cinayətkarların niyyətlərini əvvəlcədən müəyyən etdiklərini və əməliyyat hazırlamağa başladıqlarını bildiriblər.

Braziliya polisinin bəyanatında deyilir: "Bu cinayəti törədənlər konsertdə əldəqayırma partlayıcı qurğular və molotov kokteyllərindən istifadə etməklə silsilə hücumlar planlaşdırıblar. Onların hədəfi uşaqlar, yeniyetmələr və LGBT-lər olub".

"Saxta canavar" əməliyyatı nəticəsində polis bir neçə şəhərdə - Rio-de-Janeyro, Niteroi, Duque de Kaxias və Makaedə bir sıra həbslər həyata keçirib. Hazırda bir neçə ştatda bombalı hücumların hazırlanmasında iştirak edən şəxslərin tam dairəsini müəyyən etmək üçün əməliyyat tədbirləri davam etdirilir.

Qeyd edək ki, amerikalı müğənni Ledi Qaqa Rio-de-Janeyrodakı Kopakabana çimərliyində 2 milyona qədər insanın iştirak etdiyi nəhəng konsert verib. Giriş pulsuz olub və festivalın xərcləri şəhər hökuməti tərəfindən qarşılanıb.

Müğənni hazırda "Mayhem" ("Xaos") albomunu dəstəkləmək üçün böyük dünya turnesindədir. İfaçı daha sonra ABŞ, Avstraliya, Yaponiya və Cənubi Koreyada bir neçə açıq konsert proqramı ilə çıxış edəcək.

Aynil

"Saxta canavar" əməliyyatı: Polis Ledi Qaqanın konsertində terror hücumunun qarşısını aldı