ABŞ Mərkəzi Kəşfiyyat İdarəsi (MKİ) Çin Kommunist Partiyasından narazı olan şəxslərə müraciət etmək üçün sosial mediada yeni video kampaniyaya start verib. Mandarin dilində (çin dilinin ən çox danışılan ləhcəsi - red.) yayımlanan sinematik üslubda videolarda, Çinli dövlət qulluqçularına və vətəndaşlara ABŞ üçün casusluq etməyə çağırış edilir.

Sfera.az xarici mediaya istinadən xəbər verir ki, MKİ tərəfindən sosial şəbəkələrdə yerləşdirilən videolarda Çindəki korrupsiya və siyasi təzyiqlərdən narazı olanlara MKİ ilə əlaqə saxlamaq çağırışı edilir.

Təşkilatın nümayəndələri bildirirlər ki, bu tip kampaniyalar daha əvvəl Rusiya auditoriyası üçün də uğurla istifadə olunub.

MKİ direktoru Con Ratkliff kampaniyanın ABŞ-nin Çin Kommunist Partiyasına qarşı həyata keçirdiyi strateji kəşfiyyat tədbirlərinin bir hissəsi olduğunu vurğulayıb. “Tariximizdə heç bir düşmən Çin Kommunist Partiyası qədər ciddi və davamlı təhdid yaratmayıb”, – deyə o bildirib. Ratkliff videoları bu təhdidə qarşı yaradıcı və qətiyyətli cavab adlandırıb.

MKİ-nın sözçüsü isə bildirib ki, Çin vətəndaşları təşkilata yalnız təhlükəsizlik məlumatları deyil, həmçinin elm, texnologiya, kibertəhlükəsizlik və xarici siyasət sahələrində də dəyərli informasiya təqdim edə bilərlər:

“Çin vətəndaşları bilməlidirlər ki, qapımız onlara hər zaman açıqdır”.

Altı ay öncə yayımlanan başqa bir video isə Çin vətəndaşlarına MKİ ilə “dark web” üzərindən necə təhlükəsiz ünsiyyət qura biləcəklərini izah edirdi. Həmin video 900 mindən çox baxış toplamış və çinlilərdən daxil olan müraciətlərin sayında artıma səbəb olmuşdu.

Qeyd edək ki, oxşar bir kampaniya 2023-cü ildə Rusiya üçün həyata keçirilmiş, daha sonra Moskva amerikalı “vətənpərvərləri” hədəf alan əks-propaqanda videoları ilə cavab vermişdi.

Bəsti Rəfizadə
Sfera.az

ABŞ-nin kəşfiyyat idarəsi çinliləri casusluğa çağırdı: "Qapımız hər zaman açıqdır"