ABŞ administrasiyası Rusiya və Ukrayna arasındakı münaqişənin sülh yolu ilə həllində irəliləyiş olmayacağı təqdirdə, vasitəçi rolundan imtina etmək niyyətindədir. Bu barədə Dövlət Departamentinin mətbuat xidmətinin rəhbəri Temmi Brüs brifinqdə dövlət katibi Marko Rubiodan sitat gətirərkən bildirib.

Bəs ABŞ Ukrayna-Rusiya münaqişəsində vasitəçilikdən imtina edərsə, danışıqlarda hansı güclər ön plana çıxacaq?

Sözügedən məsələ ilə bağlı Sfera.az-a açıqlama verən siyasi şərhçi Kənan Novruzov ABŞ-nin danışıqlarda vasitəçi rolundan geri çəkiləcəyini zənn etmədiyini bildirib.

Müsahibimiz hazırkı mərhələdə onun bu mövqeyinin həm Rusiya, həm də Ukrayna üçün müəyyən qədər cəlbedici olduğunu deyib.

Onun sözlərinə görə, çünki hər iki tərəf Vaşinqtonun təzyiqindən yan keçmək istəyir:

“ABŞ isə “ya mənim şərtlərimə uyğunlaşın, ya da mən bu prosesdə yer almayacağam” yanaşması ilə tərəfləri təsir altında saxlayır. Lakin ABŞ prosesdən kənarlaşsa, öz strateji hədəflərini reallaşdıra bilməz. Çünki onun vasitəçilikdəki maraqları birbaşa geosiyasi prioritetləri ilə əlaqəlidir”.

K.Novruzov qeyd edib ki, Vaşinqtonun məqsədi müharibəyə son qoymaqla Ukraynaya investisiya qoymaq, Rusiya ilə münasibətləri qismən sabitləşdirmək və diqqətini Yaxın Şərq regionuna yönəltməkdir:

“Əgər nəzəri olaraq ABŞ bu missiyadan imtina etsə, o zaman ya Avropa İttifaqı təşəbbüsü öz üzərinə götürəcək, ya da Rusiya və Ukrayna birbaşa dialoqa başlaya bilər. Bu isə ABŞ üçün əlverişli ssenari sayılmır”.

Fidan Hacızadə
Sfera.az

ABŞ Rusiya və Ukraynadan imtina edəcək ? – AÇIQLAMA