İstanbul Böyükşəhər Bələdiyyəsinə (İBB) qarşı aparılan “korrupsiya” və “rüşvətxorluq” istintaqı çərçivəsində daha 18 nəfər həbs edilib.

Sfera.az “Hürriyet” nəşrinə istinadən xəbər verir ki, əməliyyat nəticəsində saxlanılaraq ədliyyəyə göndərilən və barələrində həbs tələb olunan 30 nəfər şübhəlidən 18-i İstanbul Sülh Cəza Məhkəməsinin qərarı ilə həbs edilib.

Digər 12 nəfər barəsində isə müxtəlif məhkəmə nəzarəti tədbirləri, o cümlədən ev dustaqlığı və ölkədən çıxış qadağası tətbiq olunub.

Həbs edilənlər arasında İstanbul Böyükşəhər Bələdiyyə sədri Əkrəm İmamoğlunun həyat yoldaşı Dilek İmamoğlunun böyük qardaşı Cevat Kaya, Bakırköy Bələdiyyə sədrinin müavini Əli Rıza Akyüz və İmamoğlunun davamlı istifadə etdiyi otelin təhlükəsizlik kamerasını söndürdüyü iddia edilən mühafizəçi Çağlar Türkmen də var.

Bundan əlavə, istintaqa cəlb olunan şəxslər arasında yer alan İBB sözçüsü Murat Ongunun həyat yoldaşı barəsində ev dustaqlığı qərarı da verilib.

Əməliyyatdan sonra saxlanılanlar Çağlayandakı İstanbul Ədliyyəsinə aparılıb və burada məhkəmə prosesi başa çatdırılıb.

İstanbul Baş Prokurorluğu tərəfindən aparılan istintaq çərçivəsində şübhəlilər “cinayətkar təşkilata rəhbərlik etmək”, “cinayət təşkilatına üzv olmaq”, “hədə-qorxu ilə tələb etmə”, “məlumatları ələ keçirmə” və “tenderin saxtalaşdırılması” kimi ittihamlarla araşdırılır.

İBB-yə qarşı davam edən bu korrupsiya istintaqı ölkə gündəmində ciddi rezonans doğurub və siyasi dairələrdə geniş müzakirələrə səbəb olub.

Fidan Hacızadə
Sfera.az

Əkrəm İmamoğluna görə daha 18 nəfər həbs edildi