"Rusiyanı çətin də olsa inandıra bilərik" - Tramp
ABŞ Prezidenti Donald Tramp Rusiya-Ukrayna müharibəsi ilə bağlı mühüm açıqlamalar verib. O, Rusiyanın da atəşkəsə razı salınmasının mümkün olduğunu bildirib.
Sfera.az “Milliyet”ə istinadən xəbər verir ki, Tramp Ukrayna və Rusiya ilə “çox yaxşı danışıqlar” apardıqlarını qeyd edib:
“Bu gün Rusiya və Ukrayna ilə çox yaxşı danışıqlar apardıq. Gözəl xəbərlər aldım. Ukrayna atəşkəsi qəbul etdi, Rusiyanı da çətin də olsa inandıra bilərik. Gözəl cavablar alırıq”.
O, müharibəyə görə keçmiş Prezident Co Baydeni tənqid edərək, Baydenin bu münaqişəyə icazə verməməli olduğunu vurğulayıb:
“Biz Rusiya məsələsinə qarışmamalı idik. Bayden bu müharibəyə icazə verməməli idi. Özündən qat-qat güclü biri ilə, nə qədər çox pulun olsa da, münaqişəyə girə bilmərsən”.
Tramp müharibə nəticəsində hər gün təxminən 2 min gəncin həyatını itirdiyini bildirib və bunun Üçüncü Dünya müharibəsinə yol aça biləcək bir təhlükə olduğunu deyib:
“Bütün proseslər Üçüncü Dünya müharibəsinə doğru gedirdi. İndi vəziyyət daha yaxşıdır. Bu, nüvə silahları və insanların bilmək istəməyəcəyi digər silah növləri səbəbindən misilsiz bir müharibə olardı”.
Bəsti Rəfizadə
