Volodimir Zelenski ABŞ prezidentliyinə namizəd Donald Trampla görüşü zamanı ona “qələbə planı” adlanan planı təqdim edib, cəbhədəki vəziyyət və Ukrayna Silahlı Qüvvələrinin Kursk vilayətinə müdaxiləsi barədə danışıb.
 

Sfera.az xəbər verir ki, bu barədə Ukrayna liderinin mətbuat xidməti məlumat yayıb.
 

Məlumata görə, Zelenski Trampa döyüş təmas xəttindəki vəziyyət, Ukrayna Silahlı Qüvvələrinin Kursk vilayətinə müdaxiləsinin gedişi və Rusiya regionuna hücumun məqsədləri barədə danışıb.
 

Zelenskinin ofisində qeyd edildiyi kimi, tərəflər respublikanın infrastrukturunun Rusiya Silahlı Qüvvələrinin hücumlarından qorunmasını və hücumların dəf edilməsində “Patriot” hava hücumundan müdafiə sistemlərinin rolunu müzakirə ediblər. Bundan əlavə, Ukrayna lideri Moskvanın neft və qaz satışından əldə etdiyi gəlirləri məhdudlaşdırmağa, həmçinin Rusiyanın hərbi istehsalı üçün zəruri olan komponentlərin tədarük kanallarını kəsməyə çağırıb.
 

Zelenski ilə Tramp arasında görüş sentyabrın 27-də Nyu Yorkdakı "Trump Tower"də baş tutub. Tramp Ukrayna prezidentindən müvafiq xahişlə məktub aldıqdan sonra Zelenski ilə görüşə razılıq verib. Bu görüş üçün Zelenski daha əvvəl BMT Baş Assambleyasının 79-cu sessiyasında çıxış etdiyi Nyu Yorkda qalıb. Bundan əvvəl Zelenskinin komandası Trampla onun Mar-a-Laqo iqamətgahında görüşməkdən imtina etmişdi, çünki bu, Respublikaçılara dəstək tədbiri sayıla bilərdi.

İnci
Sfera.az