Seneqallı siyasətçi, YUNESKO-nun keçmiş baş direktoru Amadou-Maxtar Mbou vəfat edib.

Sfera.az xarici mətbuata istinadən xəbər verir, o, 103 yaşında dünyasını dəyişib. 

Mbou bu vəzifəni tutan ilk və indiyə qədər yeganə afrikalı olub.

Seneqalın prezidenti və baş naziri Bassirou Diomai Faye və Ousmane Sonko, eləcə də YUNESKO-nun hazırkı baş direktoru Odri Azule siyasətçinin ölümü ilə bağlı başsağlığı verib.

Mbou 20 mart 1921-ci ildə Seneqalın paytaxtı Dakarda anadan olub. O, 1951-ci ildə Sorbonna universitetini bitirib. Seneqalda tarix və coğrafiya müəllimi olub. 1952-1957-ci illərdə Seneqalın İbtidai Təhsil Departamentinə rəhbərlik edib, daha sonra Təhsil və Mədəniyyət Naziri olub.

Mbou 1953-cü ildə YUNESKO ilə əməkdaşlığa başlayıb və Seneqal nümayəndə heyətlərinin rəhbəri olub. O, iki dəfə təşkilatın baş direktoru seçilib: 1974-1980-ci illərdə və 1980-1987-ci illərdə.