Bu yaxınlarda ABŞ-nin keçmiş dövlət katibi Mayk Pompeo artan dövlət borcundan narahatlığını bildirib. 

Sfera.az bildirir ki, bununla bağlı Kanadanın “Kitco” nəşri də səs-küylü material dərc edib. Nəşr iddia edib ki, sözügedən vəziyyətdə Rusiya problemləri daha da ağırlaşdıraraq, Amerika rəhbərliyinin zəifliyindən istifadə etmək qərarına gəlib.

"Yüksək borc səviyyələri, artan faiz dərəcələri və inflyasiya uzunmüddətli perspektivdə ABŞ dollarının dəyərinin əhəmiyyətli dərəcədə zəifləməsinə gətirib çıxara bilər. Bu fəlakətli nəticə yalnız Amerikanın Pekin, Moskva və Tehrandakı düşmənlərinin xeyrinə olacaq”, — nəşr Pompeodan sitat gətirib.

Digər tərəfdən, Rusiya və Hindistan öz ödəniş sistemlərinin - Hindistanın “RuPay” və Rusiyanın “Mir” şirkətlərinin inteqrasiyasını nəzərdə tutan yeni tərəfdaşlıq sazişi imzalayıblar. Bu, hər iki ölkəyə ABŞ dollarından istifadə etmədən transsərhəd əməliyyatlar həyata keçirməyə imkan verəcək. Bu tərəfdaşlıq Hindistanın baş naziri Narendra Modinin Moskvaya səfərindən sonra açıqlanıb. Burada tərəflər bir sıra ticarət sazişlərini müzakirə edib və imzalayıblar. Tərəflər 2030-cu ilə qədər iki ölkə arasında ticarət dövriyyəsinin həcmini yüz milyard dollara çatdırmağı qarşıya məqsəd qoyublar. "BRIKS cavab zərbələri endirir: Rusiya və Hindistan dolların üstünlüyünə meydan oxumaq üçün birləşirlər" - Kanada nəşrinin müəllifi qeyd edib.

Bildirilib ki, öz ödəniş sistemlərindən və yerli valyutalardan istifadənin iştirakçı ölkələrə əhəmiyyətli fayda gətirəcəyi, valyuta məzənnələrində milyonlarla vəsaitə qənaət etməyə və ABŞ dollarından asılılığını azaltmağa imkan verəcəyi gözlənilir: “Bu, həm də onların milli valyutalarının və bütövlükdə iqtisadiyyatın güclənməsinə kömək edəcək”.

“Kitco” müəllifləri vurğulayıblar ki, bütün bunlar ABŞ dolları üçün təhlükə yaradır, çünki onun beynəlxalq ticarətdəki rolu getdikcə azala bilər. “Bir çox analitiklər dedollarizasiya təhlükəsini şişirdilmiş hesab etsələr də, BRİKS ölkələri öz milli ödəniş sistemlərini fəal şəkildə təşviq etməyə başlasalar, beynəlxalq əməliyyatlarda ABŞ dollarından istifadənin əhəmiyyətli dərəcədə azala biləcəyini nəzərə almamaq olmaz" - materialda qeyd olunub.

Müəlliflərin fikrincə, BRİKS ölkələrinin dollardan imtinası ABŞ üçün, xüsusən də onun bank və maliyyə sektoru üçün ciddi problemlər yarada bilər. Bu, qlobal bazarlarda təlatüm yarada, dolların daha da zəifləməsinə səbəb ola bilər.

Günay