Bu ölkənin Baş naziri İSTEFA VERDİ
Banqladeşin Baş naziri Şeyx Hasina istefa verib.
Sfera.az xarici KİV-ə istinadən xəbər verir ki, onun ölkəni tərk edərək Finlandiyaya gedə biləcəyi bildirilir. Daha əvvəl “France Presse” agentliyi Baş nazirə yaxın mənbəyə istinadən onun və bacısının iğtişaşlar fonunda paytaxt Dəkkədəki rəsmi iqamətgahı tərk edərək daha təhlükəsiz yerə getdiklərini xəbər vermişdi.
“Baş nazir və bacısı daha təhlükəsiz yer tapmaq üçün Qanabhaban Sarayını tərk edib. O, müraciət hazırlamaq istəyib, lakin buna imkanı olmayıb”, - agentlik bildirib.
Agentliyin məlumatına görə, Baş nazirin ABŞ-də olan oğlu sosial şəbəkələrdə ölkənin təhlükəsizlik qüvvələrini seçilməmiş hökumətin hakimiyyətə gəlməsinə imkan verməməyə çağırıb.
Qeyd edək ki, Banqladeşin paytaxtı Dəkkədə və ölkənin digər şəhərlərində etirazlar ayrı-seçkiliyə qarşı başlayan tələbə hərəkatından sonra daha da kütləvi xarakter alıb. Etirazçılar, polis qüvvələri və hökumət tərəfdarları arasında toqquşmalar daha sonra iğtişaşlara çevrilib.
Son məlumatlara görə, iğtişaşlar nəticəsində azı 300 nəfər ölüb.
Firuzə Əliyeva
