Körpələrdən çiçək, yeniyetmələrdən isə keçi iyi gəlir - ARAŞDIRMA
![Körpələrdən çiçək, yeniyetmələrdən isə keçi iyi gəlir - ARAŞDIRMA](https://sfera.az/photo/orginal/2024/04/08/1712594333_aztibb.az_body_odour_teenagers_0_478.jpg)
Almaniyada aparılan bir araşdırma körpələrin çiçək, yeniyetmələrin isə keçi qoxusunu üzə çıxarıb.
Sfera.az xəbər verir ki, Erlangen-Nürnberg Friedrich Alexander Universitetində aparılan araşdırmada üç yaşdan kiçik 18 körpə ilə 18 yeniyetmənin qoxuları araşdırılıb.
Təcrübədə iştirakçılardan paltarlarının qoltuqlarının altına qoyulmuş pambıq lentlərlə bir gecə keçirmələri tələb olunub. İştirakçılardan həmçinin təcrübədən 48 saat əvvəl ətirdən istifadəni və soğan və ya sarımsaq yeməyi dayandırmaları istənilib. Elm adamları daha sonra laboratoriyada lentlərdə olan kimyəvi birləşmələri araşdırıblar.
"Communications Chemistry" akademik jurnalında dünən dərc edilən araşdırmada, yeniyetmələrdən alınan nümunələrdə tər və sidik qoxusuna bənzəyən kif qoxusu təsbit edilib. Araşdırmada bu, "keçi qoxusu kimi" olaraq təsvir edilib.
Körpələrdə “çiçək ətirli və sabunlu qoxuların” daha çox önə çıxdığı bildirilib. Hər iki qrupdan olan nümunələrdə “ağac qoxusu”nun olduğu da qeyd olunub.
Təcrübəni aparan Diana Ovisenko deyib ki, yeniyetmələrdə qoxular tər vəzilərinin daha çox işləməsi və yağ bezlərinin istehsal etdiyi piy ifrazının artması nəticəsində yaranır.
"Bir qoxunun hər zaman hər kəs üçün xoş və ya pis olacağını müəyyən etmək çətindir" deyən Ovisenko, bunun insandan insana dəyişən bir məsələ olduğunu sözlərinə əlavə edib.
İnci