Donuz əti sevən kişinin beynində lentşəkilli qurdlar aşkarlandı

ABŞ-da kişinin beynində lentşəkilli qurdların sürfələri tapılıb. Məlum olub ki, parazitlər az bişmiş donuz əti ilə birlikdə onun bədəninə daxil olub. 

Sfera.az bildirir ki, xəstə heç bir ağrıkəsici ilə kəsməyən və ardıcıl bir neçə həftələrlə davam edən miqren şikayətləri ilə xəstəxanaya yerləşdirilib.

Tibbi qeydlərə görə, 52 yaşlı amerikalı dərmanlara cavab verməyən şiddətli miqrenlərdən əziyyət çəkib.

Kişi qida təhlükəsizliyi riski yüksək olan bölgələrə getmədiyini iddia edib. O, həyat yoldaşı və pişiyi ilə bina evində yaşayıb. Bu evə də həşəratların girə bilmə ehtimalı olmayıb. Lakin kişi sonradan ömür boyu az qızardılmış donuz əti yeməyə üstünlük verdiyini deyib.

KT müayinəsi kişinin beynində çoxlu maye kisələri və ya kistik lezyonlar göstərib. Xəstənin beynində şiş olduğuna dair heç bir dəlil olmadığı üçün araşdırmalar anadangəlmə neyroglial kistlər diaqnozuna yönlənib.

Lakin xəstəxanaya yerləşdirildikdən və əlavə müayinələrdən sonra kişiyə neyrosistiserkoz diaqnozu qoyulub. Bu, donuz ətinin Taenia soliumun qurdlarının yaratdığı qarşısı alına bilən parazitar infeksiyadır.

"Xəstənin az bişmiş donuz ətinə üstünlük verdiyini nəzərə alaraq, biz onun sistiserkozunun təhlükəli yemək vərdişləri ilə bağlı olduğunu düşünürük"-deyə tədqiqatçılar bildirib.

Kişiyə antiinflamatuar və antiparazitar dərmanlar təyin edilib ki, bu da xəstənin tam sağalmasına kömək edib.

Neyrosistiserkoza insan mikroskopik lentşəkilli qurd yumurtalarını qəbul etdikdən sonra yoluxa bilər. Əgər insan az bişmiş, çirkli donuz əti yeyirsə, bağırsaqlarda qalan və yumurtaları nəcislə keçən lentşəkilli qurd xəstəliyinə yoluxur. Tualetdən istifadə etdikdən sonra əllərin düzgün yuyulmaması parazit yumurtalarını digər səthlərə və qidalara keçirə bilər.

Yumurtalar orqanizmə daxil olduqdan sonra yumurtadan çıxır və sürfələrə çevrilir. Onlar bəzən beyində məskunlaşır və neyrosistiserkoza səbəb olur.

Həkimlər xəbərdarlıq edir ki, xəstəliyin simptomları sürfələrin yerləşdiyi yerdən, parazitlərin sayından və ev sahibinin təmizliyindən asılı olaraq dəyişə bilər. Mümkün simptomlara epilepsiya, baş ağrısı, başgicəllənmə daxildir.

Ən yüksək yoluxma göstəriciləri Latın Amerikası, Asiya və Afrika kimi ölkələrdə müşahidə olunur. Burada donuzlar daha çox sərbəst gəzir və bəzən insan nəcisi ilə qidalanır.

Aysel

Sfera.az