Azərbaycana qarşı daha bir QƏRƏZLİ ADDIM: "Nə Qərb, nə də Paşinyan..."
Ötən gün Avropa Parlamentində “Avropa İttifaqı və Ermənistan arasında daha yaxın əlaqələr və Azərbaycanla Ermənistan arasında sülh sazişinə ehtiyac” adlı qətnamə qəbul edilib. Azərbaycan burada növbəti dəfə bir sıra məsələlərdə günahlandırılıb.
Bununla bağlı Sfera.az-a açıqlama verən politoloq Zaur Məmmədov deyib ki, bu strukturun son 3 ildə bölgədəki proseslərlə bağlı açıqlamaları Azərbaycanda ciddi qarşılanmır:
“Azərbaycan öz dövlət və milli maraqlarını qoruyacaq. Biz xaotik Qərbin tövsiyələrinə ehtiyac duymuruq. Avroparlament başa düşməlidir ki, onun rəyinin heç bir hüquqi əsası yoxdur və üzvü olmadığı dövlətin daxili işlərinə qarışmaq imicinə ucalıq gətirməyəcək. Əgər Fransa və okeanın o tayındakı bəzi mərkəzlər fürsətdən istifadə edərək geosiyasi rəqiblərinə qarşı mübarizədə Cənubi Qafqazı "sizinkilərə və bizimkilərə" bölmək istəyirlərsə, Azərbaycana müntəzəm edilən qarayaxmalarla öz məqsədlərinə çata bilməyəcəklər”.
Ekspert bildirib ki, Ermənistanın beynəlxalq platformalarda manevr imkanlarının dairəsi rəsmi Bakının addımlarının nədən ibarət olacağı ilə hüdudlaşır:
“Avroparlamentin timsalında son atılan addımlar, səsləndirilən bəyanatlar isə, nə Qərbin, nə də Paşinyan hakimiyyətinin məqsədlərinə çatmaları ilə nəticələnəcək. Əksinə, bu cür davranış, konstitusiyasında və hüquqi-normativ aktlarında hələ də Azərbaycana qarşı ərazi iddiası olan Ermənistanın hansı ərazilər çərçivəsində mövcud olacağı məsələsini aktuallaşdırır”.
Qeyd edək ki, Azərbaycan Xarici İşlər Nazirliyi də sözügedən qətnaməni ölkəyə qarşı növbəti ikili standartların bariz nümunəsi adlandırıb.
Günay
