Lavrovla Zelenski bu gün üz-üzə gələcəklər: “Necə olacağını bilmirəm...”

Bu gün Nyu-Yorkda BMT Baş Assambleyasının 78-ci sessiyası öz işinə başlayıb. Ukrayna lideri Zelenski də sözügedən tədbirlərdə iştirak edəcək.

Qurumun veto hüququna malik daimi üzvü olan Rusiyanın xarici işlər naziri Sergey Lavrovun da iclasa qatılacağı gözlənilir. Bu baxımdan onların üz-üzə gəlib-gəlməyəcəyi maraqla gözlənilir.

Sfera.az bildirir ki,  Zelenski ABŞ-yə səfəri öncəsi jurnalistlərin suallarını cavablandırıb və Rusiyanın BMT-dəki mövcudluğu ilə bağlı sərt tənqidlər səsləndirib: “Çox təəssüf...BMT-də hələ də rus terrorçularına yer qalıbsa, bu artıq mənim üçün sual deyil. Düşünürəm ki, bu, təşkilatın bütün üzvlərinə verilməli olan sualdır”.

Jurnalistlərin “Lavrov çıxış edərkən orada qalacaqsınızmı” sualına cavab verən Ukrayna lideri “Həqiqətən, necə olacağını bilmirəm” deyib.

Xatırladaq ki, Rusiyanın xarici işlər naziri Lavrov ötən il BMT Təhlükəsizlik Şurasında Ukrayna prezidenti Zelenskiyə qarşı sərt ifadələr işlətmişdi. Ukrayna təmsilçiləri isə Lavrovun istifadə etdiyi jarqonun qəbuledilməz olduğunu bildirərək Rusiyaya reaksiya vermişdi.

Qeyd edək ki, BMT-nin tədbirləri 19-25 sentyabr tarixlərində baş tutacaq.

Günay Rəsulqızı