Son illər Azərbaycanda boşanma hallarında artım müşahidə olunur. Maraqlıdır ki, bu artımın səbəbi yalnız ailədaxili narazılıqlar və münasibət problemləri ilə bağlı deyil. Mütəxəssislər qeyd edirlər ki, bəzi boşanmalar sırf sosial və iqtisadi məqsədlərlə – kredit götürmək, əmlak əldə etmək və ya sosial müavinət almaq üçün həyata keçirilir.

Sfera.az xəbər verir ki, mövzu ilə bağlı danışan əmlak eksperti Elnur Fərzəliyevin fikrincə, bir çox ailələr hüquqi boşanmanı problemlərinin “həlli” kimi görür.

O, şahidi olduğu bəzi boşanmaları diqqətə çatdırıb:

“İpoteka krediti ilə ev alan zaman əmək haqqından ailə üzvlərinin adambaşına yaşam xərci çıxıldıqda ümumi məbləğ az olduğuna görə kreditin ayrılmaması səbəbindən çox hallarda süni boşanma edirlər və bu zaman qarşı tərəf heç bir aliment tələbi etmədən uşaqları özündə saxlayır və ər rahat şəkildə ipoteka krediti ilə ev alır. Daha sonra isə "barışırlar". Evləri sökülən şəxslər tikinti şirkətlərindən əlavə ev almaq üçün süni boşanma edib evi ikiyə bölərək iki çıxarış əldə edirlər. Söküntü zamanı isə hər ikisi evlə təmin olunurlar. Borclu olan şəxslər həmin borcun əmlaka yönəlməməsi üçün süni boşanma edərək ər evi arvadın adına keçirir və evin borc əvəzinə müsadirə edilməsinin qarşısını alır. Dövlətdən sosial müavinət almaq üçün saysız hesabsız boşananlar da var”.

Ekspert qeyd edib ki, buna bənzər çox sayda problemlərin həlli üçün əksər insanlar çıxış yolunu boşanmalarda görürlər. Onun sözlırinə görə, əksər hallarda bu tip boşanmalar problemlərin həlli üçün effektiv olur.

Firuzə Əliyeva
Sfera.az

Azərbaycanda süni boşanmalar artır: "Bu, bəzən səmərəli olur"