Bakı metrosunda törədilmiş terror aktından 30 il ÖTÜR
Bu gün Bakı metrosunda törədilmiş terror aktından 30 il keçir.
Sfera.az xəbər verir ki, 1994-cü il iyulun 3-də saat 8:30-da metronun “Gənclik” stansiyasının platformasına 500 metr qalmış elektrik qatarının vaqonunda bomba partlayıb. Partlayışdan sonra qatarın vaqonları alışıb. Terror aktı nəticəsində 13 nəfər həlak olub, 58 nəfər yaralanıb.
“28 May” və “Gənclik” metrostansiyaları arasında partlayışın təşkil edilməsi faktı ilə Azərbaycan vətəndaşı Azər Aslanov Moskvada həbs edilib. 1997-ci ilin 29 noyabr tarixində onu Azərbaycana ekstradisiya ediblər. 1998-ci ildə Aslanov bu terror aktını reallaşdırmaq göstərişini erməni əsirliyində olarkən publisist Zori Balayandan aldığını etiraf edib.
Məhkəmə ona ömürlük həbs cəzası verib. İstintaq müəyyən edib ki, terror aktının təlimatçıları Ermənistanın xüsusi təyinatlı orqanlarının əməkdaşları polkovnik Karen Baqdasaryan və kapitan Seyran Sarkisyan olub. Aslanovun bəyanatına əsaslanaraq Azərbaycan məhkəməsinin qərarı ilə Balayana qarşı cinayət işi açılıb.
1999-cu ildə Azərbaycan Baş Prokurorluğunun təqdimatı əsasında İnterpol publisisti xüsusi təhlükəli cinayətkar kimi beynəlxalq axtarışa verib. Sonra isə Azərbaycan Prokurorluğu onu MDB ölkələrində dövlətlərarası axtarışa verib. Amma 2001-ci ildə İnterpol məsələyə yenidən baxaraq Balayanı axtarılan şəxslər siyahısından silib.
Qeyd edək ki, 1994-cü ilin iyul ayının 3-də baş verən partlayış Bakı metrosunda törədilmiş ikinci terror aktıdır.
Belə ki, 1994-cü il mart ayının 19-da da saat 13:00-da “20 Yanvar” metrostansiyasında partlayış olub. Qatarın baş vaqonuna qoyulmuş saat mexanizmli əldə düzəltmə bomba qatar stansiyada dayananda işə düşüb.Terror aktı zamanı 14 nəfər ölüb, 49 nəfər yaralanıb. Terror aktının icraçısı Oqtay Qurbanov partlayış zamanı ölüb. Həlak olanlar arasında Xalq artisti Rafiq Babayev də olub.
Fidan
