Hüquqşünas 200 manata qaldırılan cərimə barədə: \"Belələrini bu yoldan çəkindirmək üçün...\"

Yol hərəkəti sahəsində bəzi cərimələrin artırılması və yeni cərimələrin müəyyən edilməsi ilə bağlı layihə barədə məlumatlar yayılır.

Bu barədə Sfera.az-a açıqlama verən nəqliyyat məsələləri üzrə ekspert, hüquqşünas Ərşad Hüseynov deyib ki,  layihələr hələlik ortada olmasa da, söhbətin rəsmi olduğu şübhə doğurmur.

Onun sözlərinə görə, sonuncu dəfə 2023-cü ilin iyulunda bəzi cərimələr artırılmışdı:

“Cərimələrin belə tez-tez artırılması heç də yaxşı hal deyil. Əsas hədəf tam hüquqi müəyyənliyin və bundan sonra məsuliyyətin labüdlüyünün təmin edilməsi, insanlarda yüksək hüquq mədəniyyəti və məsuliyyətli davranış tərzinin formalaşdırılması olmalıdır.  Artırılan cərimələrin bəziləri hazırda 10 manatdır. Bunun artırılmasını başa düşmək olar, 20 manat olacağı deyilir. Amma ötən il 60 manatdan 80 manata qaldırılan cərimənin bir il sonra 100 manata qaldırılmasını iqtisadi və hüquqi olaraq əsaslandırmaq mümkün deyil”.

Ekspert bildirib ki, sürücülük hüququ olmadan idarə etmənin cəriməsinin 100 manatdan 200 manata qaldırılacağı deyilir:

“Maraqlıdır, görəsən kimlər 100 manata əhəmiyyətsiz baxırlar ki, belələrini bu xətadan çəkindirmək üçün bu cəriməni 2 dəfə artırmaq zərurəti var? Bəzi cərimələrin tətbiqindəki qeyri-müəyyənliyi və mübahisələri aradan qaldırmaq üçün yol hərəkəti qaydalarında da ciddi dəyişikliklərə ehtiyac var”.

Günay