Sənəddə "daha dinc və çiçəklənən gələcəyin qurulması” barədə tərəflərin başlıca yanaşmaları öz əksini tapıb. 60 il əvvəl bağlanmış bu müqavilənin yenilənməsinin perspektivləri isə müzakirə olunmaqdadır.

 

Sözügedən sənədin nəticələri ilə bağlı Sfera.az-a danışan politoloq Məhəmməd Əsədullazadə Böyük Britaniya və ABŞ-ın müəyyən əraziləri öz təsirləri altına salacaqlarını bildirib:

"ABŞ Prezidenti Co Baydenin Böyük Britaniyaya səfəri 60 il əvvəl bağlanmış Atlantika Xartiyası və oradakı müəyyən maddələrə dəyişiklillər edilməsi ilə nəticələndi.

Bildiyiniz kimi, Böyük Britaniya Avropa İttifaqını tərk etdi. Böyük Britaniyanın da beynəlxalq müstəvidə öz maraqları mövcuddur. Bu da ABŞ-la müəyyən dərəcədə ziddiyyət təşkil edir. O səbəblə, ABŞ da yeni bir dünya nizamına uyğun olaraq xartiyanın imzalanmasını istəyirdi. Görünür ki, Böyük Britaniya da bununla razılaşıb. Təbii ki, 60 il öncəki ilə indiki dövrdə imzalanmış müqavilə arasında çox ciddi fərqlər var. Hazırda işğal və ya hər hansı ölkəni müstəmləkə halına salmaq dövrü deyil. Ona görə də bu xartiya təhlükəsizlik və terrorizmlə mübarizə ilə bağlı, həmçinin hər iki dövlətin müəyyən əraziləri öz maraq dairəsinə salmaq planı kimi də xarakterizə oluna bilər". 

"Yeni xartiyada yumşaq gücdən istifadə olunacaq. Böyük Britaniya əvvəllər Avropa İttifaqının tərkibində olmaqla beynəlxalq müstəvidə mühüm rol oynamaqdan geri çəkilmişdi. Bu yolda ABŞ təkbaşına gedirdi. İndi isə Böyük Britaniya artıq müstəqil xarici siyasət həyata keçirərək öz qlobal gücümü qorumağa çalışır. ABŞ da öz növbəsində, bu məsələdə Böyük Britaniyanı yanına alaraq birlikdə Rusiyaya qarşı plan hazırlayacaq. Düşünürəm ki, tam formada bu xartiyaya əməl olunmayacaq. Lakin tərəflər müəyyən dərəcədə öz maraqlarını uzlaşdıracaqlar. Bu, anqlosaksların dünyanı idarə etməsinin yeni bir xartiyasıdır. Biz yeni dünya nizamında ABŞ və Böyük Britaniyanın birgə hərəkət etməsinin şahidi ola biləcəyik".