Azərbaycanda boşandıqdan sonra ata tərəfindən alimentin ödənilməməsinə görə həbslər həyata keçirilir. Amma bir sıra hallarda elə durum yaranır ki, aliment ödəməli olan ata işsiz olur. Bu fonda işsiz atanı həbs etmək nə dərəcədə doğrudur?

Sfera.az-a açıqlamasında mövzuyla bağlı səsləndirilən suallara vəkil Vamiq Şükürov cavab verib:

"Mövcud qanunvericiliyə görə, ilk növbədə uşağı valideynlər saxlamalı, onların maddi və digər təminatlarını həyata keçirməlidirlər. Məhkəmə qərarı ilə uşaq adəti üzrə ananın himayəsində saxlanılırsa, övladın aylıq təminatını ata ödəməlidir. Bəzən həmin ödənişi qəsdən, bəzən də imkansızlıqdan atalar ödəyə bilmir. Alimentin qəsdən, yaxud işsizlik səbəbindən ödənilmədiyini müəyyənləşdirmək həmin məsələ barədə çıxarılan məhkəmə qərarını yerinə yetirən icra məmurlarının öhdəsindədir. Onlar alment ödəməli olan şəxsin ondan qəsdən yayındığını, yoxsa imkansız olduğundan ödəyə bilmədiyini müəyyənləşdirməlidir. Bu da müəyyən mülahizə və sübutlara əsasən müəyyən edilir”.

Vəkil bildirdi ki, alimentin ödənilməsinə imkanın olmaması müxtəlif üzürlü səbəblərdən yarana bilər:

"Məsələn, aliment ödəməli olan atanın sağlamlığında problem yarana bilər və o işləyə bilməz. Yaxud da işsiz olar. İşlə təmin olunmaq üçün məşğulluq orqanlarına müraciət edilməlidir. Bu zaman da işsizlik müavinatı alan ata onun bir hissəsini aliment olaraq ödədiyini sübut etməlidir. Adətən aliment ödəməli olan borclu şəxslər dövlət orqanları ilə münasibətlərini düzgün qurmurlar. Digər tərəfdən, alimenti ödəmək imkanında olmayan şəxslər illərlə bu barədə icra məmurlarına rəsmi məlumatlar vermir, sənəd və sübutları təqdim etmirlər. Yalnız icra məmurları həmin şəxsləri axtarışa verdiyi zaman onlar əl-ayağa düşürlər. Onlarla bağlı verilən məhkəmə qərarları da qanuna və ədalətə əsaslanmalıdır. Qanun da tələb edir ki, alimentin verilməməsi üzürlü səbəbdən yaranıbsa, onu ödəyə bilməyən şəxsin həbsi qanunsuzdur. Məhkəmələr bu məsələlərə ciddi şəkildə əməl etməlidir”.

Elçin.