“Rabitəbank”ın xalis mənfəətində sıçrayış
"Rabitəbank” ASC 2019-cu ilin 1-ci yarısını 4 milyon 835 min manat vergidən əvvəl mənfəət ilə başa vurub. 2018-ci ilin eyni dövrü ilə müqayisədə Bankın vergidən əvvəl mənfəəti 15,5 dəfə artıb. "Rabitəbank” 2018-ci ilin 1-ci yarısını 311 min manat vergidən əvvəl mənfəət ilə bağlamışdı. Mənfəətin artmasının səbəbləri gəlirlərin artması və ehtiyata ayırmanın azalmasıdır.
GƏLİRLƏRİ ARTIB
"Marja” Bankın rüblük hesabatlarına istinadən xəbər verir ki, ötən ilin ilk 6 ayında faiz gəlirləri 17 milyon 483 min manat ikən, cari ilin ilk 6 ayında 18 milyon 256 min manattəşkil edib (4,4% çox). "Rabitəbank”ın qeyri-faiz gəlirləri isə 4,9% artımla 4 milyon 682 min manata yüksəlib.
ƏMƏLİYYAT MƏNFƏƏTİ ARTIB
2019-cu ilin yanvar-iyun dövründə "Rabitəbank” 22 milyon 938 min manat cəmi gəlirləri əldə etmək üçün 18 milyon 10 min manat xərc çəkib. Nəticədə Bankın 4 milyon 928 min manat əməliyyat mənfəəti qalıb. Əməliyyat mənfəətinin 94 min manatı ehtiyata ayrılıb (ötən ilin eyni dövrü ilə müqayisədə 39 dəfə az) və nəticədə Bankın 4 milyon 835 min manat vergidən əvvəl mənfəəti qalıb.
2018-ci ilin yanvar-iyun dövründə "Rabitəbank” 21 milyon 946 min manat cəmi gəliriəldə etmək üçün 17 milyon 955 min manat xərc çəkmiş və 3 milyon 991 min manat əməliyyat mənfəəti əldə etmişdi. Bankın əməliyyat mənfəətinin 3 milyon 678 min manatını ehtiyata ayırdığından həmin dövrü 311 min manat mənfəət ilə bağlamışdı.
Ötən ilin birinci yarısı ilə müqayisədə "Rabitəbank”ın faiz xərcləri azalıb, qeyri-faiz xərcləri təxminən eyni səviyyədə qalıb, inzibati xərcləri isə artıb. "Rabitəbank”ın faiz xərcləri 1 milyon 873 min manat azalaraq 5 milyon 203 min manata geriləyib, inzibati xərcləri isə 1 milyon 966 min manat artaraq 9 milyon 309 min manata yüksəlib.
MÜŞTƏRİLƏRƏ VERİLƏN KREDİTLƏR ARTIB
Ötən ilin 1-ci yarısının sonu ilə müqayisədə "Rabitəbank”ın müştərilərə verdiyi cəmi kreditlər 83 milyon 158 min manat və ya 31,6% artaraq 30 İyun 2019-cu il tarixində 346 milyon 502 min manata çatıb. Ötən 12 ay ərzində Bankın aktivləri isə 101 milyon 88 min manat və ya 14,2% azalaraq 611 milyon 404 min manata düşüb. Aktivlərin azalmasının səbəbi likvid aktivlərin azalmasıdır. Öhdəliklərdə yer alan müştərilərin cari hesablarındakı vəsaitlərin 98 milyon 348 min manat və ya 31,2% azalaraq 216 milyon 457 min manata düşməsilə əlaqədar olaraq likvid aktivlər də azalıb.
30 İyun 2019-cu il tarixində "Rabitəbank” 107 milyon 811 min manat məcmu kapitala malik olub.