Qarabağda müharibə başlaya bilərmi? - ekspert rəyi
14:36 / 05.03.2019
3406
"Yaxın perspektivdə müharibənin başlanması real görünmür”
Sfera.az-a açıqlamasında bu sözləri İrəvanın qeyri-konstruktiv mövqe sərgiləməkdə davam etməsi fonunda Qarabağda müharibənin yenidən alovlana biləcəyilə bağlı sualı dəyərləndirərkən politoloq Elşən Mirzəoğlu deyib.
Bununla belə, həmsöhbətimiz onu da vurğuladı ki, işğala məruz qalan ölkə olaraq Azərbaycan torpaqları azad etmək üçün hər zaman savaşa başlaya bilər. Beynəlxalq hüquq da buna imkan verir:
"Əslində ATƏT-in Minsk qrupu üzrə həmsədr dövlətləri təmsilçilərinin keçən ayın sonlarında Bakı və İrəvanda apardıqları danışıqların nəticəsindən çıxış edərək məsələyə yanaşsaq təbii ki, yaxın perspektivdə müharibənin başlanması bir qədər real görünmür. Minsk qrupu təmsilçiləri hər halda Azərbaycan dövlət başçısı ilə və Ermənistan hökumət başçısı arasında növbəti görüşlə bağlı məsələdə razılığa gəliblər.
Düzdür, həmin görüş ərəfəsində də Ermənistan tərəfinin verdiyi bəyanat və açıqlamalar münaqişənin sülh yolu ilə həllinə hər hansı bir ümid yaratmır. Çünki erməni tərəfi israrla qeyd edir ki, sülh müqabilində ərazi güzəştlərindən söhbət gedə bilməz. Bu da İrəvanın indiyə kimi sərgilədiyi qeyri-konstruktiv mövqeyin bu gün də davam etdirildiyini göstərir. Amma bütün hallarda Azərbaycan prezidentilə Ermənistan baş naziri arasında görüşün baş tutmasından sonra hadisələrin konkret olaraq hansı istiqamətdə gedəcəyilə bağlı daha dürüst fikir bildirmək olar. Hərçənd ki, görüş ərəfəsində də onun gündəliyi və orada müzakirə olunacaq məsələlərin format və məzmunu ilə bağlı da konkret razılıq yoxdur. Azərbaycan tərəfi bu görüşə razı olmaqla özünün sülhpərvər mövqeyini, üzərinə götürdüyü öhdəliklərə sadiq olduğunu bir daha təsdiq edir. Ancaq Ermənistan bundan sonra da qeyri-konstruktiv mövqe sərgiləməkdə davam edəcəksə, danışıqları danışıqlar naminə aparmağın əhəmiyyəti yoxdur.
Azərbaycan BMT nizamnaməsinin 51-ci maddəsinə görə, təcavüzə məruz qalan tərəfdir. Ona görə işğal altında olan əraziləri hərbi yolla azad etmək hüququnu da özündə saxlayır. Ermənistan ordusu müharibə aparmaq iqtidarında olan tərəf deyil. Rəqəmlər, faktlar, hərbi büdcə xərcləri, 2016-cı ilin aprel döyüşlərinin təcrübəsi göstərir ki, İrəvan müharibənin başlanması istiqamətində hər hansı bir addım atsa, daha ciddi və daha sarsıdıcı zərbə alacaq. Hansı ki, həmin zərbədən sonra havadarlarının dəstəyinə baxmayaraq, Ermənistan bir daha özünə gələ bilməyəcək. Azərbaycanın hansı gücə malik olduğunu Ermənistan rəsmiləri də gözəl bilir. Ermənistan Azərbaycanla müharibə etmək iqtidarında olan tərəf deyil”.
Qeyd edək ki, son zamanlar İrəvan rəsmilərinin açıqlamaları onların danışıqlara hazır olmadığını söyləməyə bir daha əsas verir. Belə ki, baş nazir Nikol Paşinyan Dağlıq Qarabağ separatçılarının da danışıqlar prosesinə cəlb edilməsi kimi sərsəm fikrindən hələ də əl çəkmir. Bu azmış kimi onun İrana olan səfərinin ardınca işğalçı ölkənin Milli Təhlükəsizlik Xidmətinin direktoru Artur Vanetsyan da bəyanatla çıxış edərək Araz çayı boyu ərazilərdə ermənilərin məskunlaşdırılacağını, bu ərazilərin qaytarılmasından söhbət belə gedə bilməyəcəyini açıqlayıb. Bütün bunlar onu göstərir ki, İrəvan sülhə hazır deyil. Belə olduqda, problemin həlli üçün yeganə çxıış yolu qalır, savaş.
ELÇİN
