"Proqramlarda elə fənlər var ki, onları keçməyə gərək yoxdur" - Nazir
"Ali təhsil müəssisələrində proqramların dəyişməsi sürətli olan proses deyil. Cəmiyyət olaraq başa düşməliyik ki, dəyişiklik ağrılı prosesdir".
Sfera.az xəbər verir ki, bunu bu gün keçirilən Təhsilin İnkişafı Forumunda elm və təhsil naziri Emin Əmrullayev panel müzakirəsi zamanı deyib.
O bildirib ki, universitetlərdə proqram dəyişikliyi olması hansısa fənn müəlliminin işini itirməsi deməkdir:
"Deyirik ki, müəllimlik ixtisasında bir il əlavə məşğələlər edək. Hazırıqmı bu dəyişikliyə? Bəzi hallarda dəyişiklikləri daha yavaş etməyimiz təhsildən əlavə sahələrlə bağlıdır. Bir şeyi dəyişəndə o digərlərinə də təsir edir. Bunu etmək o qədər də asan proses deyil. A nöqtəsindən Z nöqtəsinə getmək kifayət qədər enerji tələb edir".
Nazir bildirib ki, sertifikasiya da belə proses idi:
"Sertifikasiya prosesi də oxşar proses idi. Sertifikatlaşdırma zamanı biz 5300 müəllimin müqavilələrinə xitam verdik. Bunu qürurla demirəm, bizim üçün də ağrılı proses idi. Dəyişikliklər əsasən ağrılı proseslərdir. Əgər biz bu qərarları vermək istəyiriksə, onda nəticələrinə də dözməliyik".
Emin Əmrullayev ali təhsil müəssisələrində proqramlar ilə bağlı problemə toxunaraq bildirib ki, kifayət qədər fənn var ki, onları keçməyə ehtiyac yoxdur:
"Proqramlarda elə fənlər var ki, onları keçməyə gərək yoxdur. Bizə görə bunu etmək asandır. Biz hazırıqsa, gəlin, dəyişək. Ali təhsil müəssisələrini təkləmək lazım deyil ki, niyə proqramları dəyişmirsiniz. Onların ictimaiyyət qarşısında məsuliyyəti böyükdür. Əvvəlcə problemi tanımalıyıq. Bu yalnızca universitetlərin yükü deyil. Bugünkü proqramlar 20 il əvvəlki ilə müqayisədə daha mütərəqqidir”.
Firuzə Əliyeva
