Bildiyimiz kimi, ölkəmizdəki ali təhsil müəssisələrinin hər birində keçid balları müxtəlifdir. Xüsusən də, prestijli universitetlərə qəbul balları digərlərinə nisbətən daha yüksək olur. Təbii ki, dünya təcrübəsinə baxsaq, xarici unversitetlərdə də daha prestijli olanlara qəbul üçün yüksək göstəricilər lazımdır.

Belə olan halda, qəbul balını universitetin keyfiyyət göstəricisi kimi qəbul edə bilərikmi?

Mövzu ilə bağlı Sfera.az-a açıqlama verən təhsil eksperti Vüsal Kərimli bildirib ki, dünyada fərqli qiymətləndirmə növləri var:

“Dünyada tələbələrin qəbul mexanizmi fərqli olduğu üçün düşünürəm ki, giriş ballarının yüksəkliyi birmənalı olaraq həmin universitetin təhsilinin yaxşı olması və dünya reytinqlərində yüksək yerləri tutması ilə əlaqəlidir. Bizdə qəbul sisteminin alternativ qiymətləndirmə metodu olmadığı üçün onu tam olaraq Azərbaycan universitetləri üçün deyə bilmirik. Bu gün biz Dövlət İmtahan Mərkəzindən yüksək bal toplayan tələbənin seçdiyi universitetləri həmin ali təhsil müəssisələrinin keyfiyyət göstəricisi kimi izah edirik”. 

Ekspertin sözlərinə görə, yüksək ballı tələbələrin 50 faizdən çoxu bir universiteti seçirsə, bu, həmin ali təhsil müəssisəsinin keyfiyyət göstəricisidir və belə də qəbul edilməlidir.

“Düşünürəm ki, gələcəkdə bizdə də ali təhsil müəssisələrinə tələbə qəbulunun mexanizmində dəyişiklik edilməli və alternativ, fərqli qiymətləndirmə metodları ilə qəbul aparılmalıdır”,- V.Kərimli qeyd edib. 

Firuzə Əliyeva