"Bu universitetlərdə plan yerləri tam dolub" - RƏSMİ + ADLAR

"I mərhələdən sonra tələbə qəbulu aparılan 44 ali təhsil müəssisəsinin 25-də plan yerləri 95%-dən çox, o cümlədən 8 ali təhsil müəssisəsində 100 % dolub". 

Sfera.az xəbər verir ki, bunu Dövlət İmtahan Mərkəzinin İdarə Heyətinin sədri Məleykə Abbaszadə bu gün jurnalistlərə açıqlamasında deyib.

Sədrin sözlərinə görə, plan yeri 100 faiz dolan ali təhsil müəssisələri Azərbaycan Tibb Universiteti, Azərbaycan Respublikasının Prezidenti yanında Dövlət İdarəçilik Akademiyası, ADA Universiteti, Azərbaycan Dövlət Dəniz Akademiyası, Bakı Ali Neft Məktəbi, Dövlət Gömrük Komitəsinin Akademiyası, Azərbaycan İlahiyyat İnstitutu, Azərbaycan Əmək və Sosial Münasibətlər Akademiyasıdır.

M.Abbaszadə qeyd edib ki, ilk dəfə qəbul aparılan Qarabağ Universitetinin plan yerləri 98,57%, Türkiyə – Azərbaycan Universitetinin plan yerləri 96,67%, İtaliya – Azərbaycan Universitetinin plan yerləri 95,52% dolub.

Firuzə Əliyeva