Vakansiya seçimində hər il 3 minə qədər yer seçilmir

“Müəllimlərin işə qəbulu üzrə müsabiqənin vakansiya seçimi mərhələsində hər il 3 minə qədər yer seçilmir”.

Sfera.az xəbər verir ki, bunu Məktəbəqədər və Ümumi Təhsil üzrə Dövlət Agentliyi İnsan Resursları Mərkəzinin şöbə müdiri Muxtar Hacıyev deyib. O qeyd edib ki, il boyunca vakansiyaların sayı 17- 18 minə qədər çatır:

“Hər il seçim üçün 10 min vakansiya təqdim olunur. 3 minə qədər vakansiyanın seçilməməsinin səbəbi isə adətən məktəblərin mərkəzlərə uzaq yerlərdə yerləşməsi ilə əlqədar olur. Namizədlərin əksəriyyəti evinin yanında işləmək istəyir. Lakin bu məktəblərdə də ixtisas üzrə müəllimlərin təmin edilməsi üçün biz həmin vakansiyaları təkrar seçimə təqdim etməliyik. Vakansiyaların gizlədilməsi halı ilə bağlı konkret olaraq faktlar var deyə bilmərik. Biz bununla bağlı bütün müraciətləri nəzərə alır və araşdırırıq. Vətəndaşlardan da xahiş edirik ki, hansısa məktəbdə vakansiyanın gizlədilməsi halı varsa, bununla bağlı bizə məlumat versinlər”, - o, bildirib.

Firuzə Əliyeva