Bu il ali təhsil müəssisələrinə qəbul olunmaq üçün müsabiqə şərtlərini ödəyən abituriyentlərin (həmçinin subbakalavrlar) ixtisas seçimi 16-28 avqust tarixlərində aparılacaq.

Maraqlıdır, keçid ballarında ötən illə müqayisədə ciddi fərqlər ola bilərmi? Abituriyentlər ixtisas seçimi edərkən nələrə diqqət yetirməlidirlər?

Mövzu ilə bağlı Sfera.az-a açıqlama verən təhsil məsələləri üzrə ekpsert Elçin Əfəndi dövlət sifarişli plan yerlərinin artmasının mübsət hal olduğunu deyib:

“İxtisas seçimi zamanı abituriyentlər daha diqqətli olmalıdırlar. Ötən ilə nisbətdə bu il dövlət sifarişli yerlərdə artım var və bu bir qədər keçid ballarına təsir etmiş olacaq. Lakin ödənişli plan yerlərində ola bilsin ki, müəyyən qədər artım olsun. Qruplar üzrə baxsaq, ən böyük rəqabət 200 baldan 450 baladək toplayan abituriyentlər arasında olacaq. Valideynlər isə övladları seçim edərəkən dövlət sifarişli yerlərə düşərsə, belə yerləri seçmələrinə diqqət yetirməli, ailə büdcələrini nəzərə alaraq yüksək ödənişli yerləri yazıb sonradan imtina ilə üz-üzə qalmamalıdırlar. Dövlət sifarişli plan yerləri 27 000-dən çox artıb. 2006-2008-ci illərdə isə ümumi plan yerləri 27 000 idi. İxtisas seçimi mərhələsi abituriyent dönəmindən indiyədək ən kritik mərhələdir. Çünki bu mərhələdə abituriyentin gələcək üçün kariyera imkanları həll olunur. Ən həlledici məqam olduğu üçün məsləhət görürəm ki, abituriyentlər mütəxəsssislərlə bu işi görsünlər. Lakin mütəxəssis seçimi edərkən də sıradan şəxslərə yox, peşəkarlara üz tutmaq lazımdır”.

Ekspert bu il bəzi ixtisaslarda keçid balının aşağı düşəcəyini deyib. E.Əfəndi bəzi qrupların nümayəndələrini xüsusilə diqqətli olmağa çağırıb:

“Dövlət sifarişli yerlərdə artım keçid ballarına təsir edəcək. Amma ödənişli əsaslarla 200-400 ballıq ixtisasların keçid ballarında da artım gözləyirik. Hazırda daha yaxşı vəziyyət II ixtisas qrupundadır. I və IV qruplarda vəziyyət çox gərgin olacaq. Ona görə ki, müvafiq plan yerlərinə nisbətdə abituriyent sayı çoxdur. III qrupda TC alt qrupunda ballarda bir qədər artım gözləyirik. DT alt qrupunda isə bəzi ixtisaslarda ola bilsin ki, bal düşüşü olsun. Ümumi qiymətləndirmə aparsaq, bu il daha şanslılar subbakalavrlardır. Onların ötən illə nisbətdə bu il ali məktəblərə qəbul olma şansı daha yüksəkdir”.

Əzizə Zeynal

“Bəzi ixtisaslarda keçid balının aşağı düşəcəyi gözlənilir” - Ekspert