Paşinyan niyə qorxurdu ki, Moskva onun həbsinə göstəriş verə bilər?
Ermənistanın keçmiş müdafiə naziri Aşot Karapetyanın açıqlamaları Baş nazir Nikol Paşinyanın Rusiya ilə münasibətlərinə dair diqqətçəkən suallar yaradıb.
Sfera.az erməni mediasına istnadən xəbər verir ki, Karapetyan müsahibəsində müdafiə naziri olduğu dövrdə Paşinyanın ona “Moskvadan göstəriş verə bilərlərmi ki, məni həbs edəsən?” sualını verdiyini bildirib.
Karapetyanın sözlərinə görə, o, Paşinyana “Səni yalnız bir halda həbs edərlər – əgər satqın çıxsan” cavabını verib. Keçmiş nazir həmin vaxt bu söhbətin zarafatla qarşılandığını və mövzunun bağlandığını deyib.
Lakin bu açıqlama Ermənistanın son illərdə Rusiya ilə münasibətlərində baş verən kəskin dəyişiklik fonunda diqqət çəkir. Paşinyan hakimiyyəti sonrakı illərdə Moskva ilə münasibətlərdə məsafəni artırıb, Qərblə əlaqələri genişləndirib və Ermənistanın Avropa strukturları ilə əməkdaşlığını gücləndirib.
Eyni zamanda İrəvan Rusiyanın təhlükəsizlik strukturlarının Ermənistanın daxili və xarici siyasətinə təsiri ilə bağlı əvvəlkindən daha sərt mövqe nümayiş etdirib. Ermənistanın KTMT-də iştirakı faktiki olaraq dondurulub, Rusiya ilə təhlükəsizlik münasibətlərinin gələcəyi barədə də açıq müzakirələr aparılıb.
Karapetyanın açıqlaması bu baxımdan mühüm sual doğurur: Paşinyan niyə Rusiyadan öz həbsinə dair göstəriş verilə biləcəyini düşünürdü?
Bu sualın bir neçə mümkün izahı var. Bu, həmin dövrdə Moskvanın Ermənistan siyasətindəki təsirinin miqyası ilə bağlı Paşinyanın təsəvvürlərindən irəli gələ bilərdi. Digər ehtimal isə baş nazirin şəxsi siyasi təhlükəsizliklə bağlı narahatlıq keçirməsi idi.
Lakin Karapetyanın açıqlamasında Paşinyanın bu sualı hansı konkret səbəbdən verdiyi izah edilmir. Buna görə də həmin fikrin arxasında konkret siyasi məlumatın, şəxsi narahatlığın və ya başqa səbəbin dayandığını demək mümkün deyil.
Bununla belə, keçmiş nazirin açıqlaması Ermənistanın sonrakı siyasi kursu ilə birlikdə nəzərdən keçirildikdə diqqətçəkən mənzərə yaradır. Moskva ilə münasibətlərin soyuması, Qərblə yaxınlaşma, Türkiyə və Azərbaycanla münasibətlərin normallaşdırılması istiqamətində atılan addımlar Ermənistanın xarici siyasətində ciddi dəyişikliklərə səbəb olub.
İndi əsas sual budur: Paşinyanın Moskvadan uzaqlaşması yalnız geosiyasi hesablamanın nəticəsi idi, yoxsa Rusiya ilə münasibətlərdə özünü təhlükə altında hiss etməsi də bu qərarlara təsir göstərib?
Karapetyanın açıqladığı bir cümlə isə bu müzakirəni yenidən gündəmə gətirib: “Moskvadan göstəriş verə bilərlərmi ki, məni həbs edəsən?”
İnci
