Əliyev və Paşinyanla Ağ Evdə görüşəcək – Yeni sülh planı gündəmdədir?

ABŞ Prezidenti Donald Trampın Azərbaycan Prezidenti İlham Əliyev və Ermənistanın Baş naziri Nikol Paşinyanı Ağ Evdə qəbul edəcəyi barədə məlumat yayılıb. Hələlik bu görüşlə bağlı rəsmi təsdiq olmasa da, ehtimallar yüksək qiymətləndirilir.

Mümkün görüşlə bağlı Sfera.az-a açıqlama verən siyasi şərhçi Tural İrfanın sözlərinə görə, Azərbaycanın həyata keçirdiyi səmərəli xarici siyasət nəticəsində Ermənistanla sülhə nail olmaq üzrədir. Prosesin bu vaxta qədər uzanması isə sülhün dayaqlarının daha möhkəm olması məqsədilə baş verib.

“Etibarlı, köklü, əsaslı və dözümlü sabitliyə, sülhə imza atmaq böyük səylər və məsuliyyət tələb edir. Lakin görülən işlər göstərir ki, artıq bunlara nail olunub. Hətta ABŞ kimi dövlətlər də bu prosesin uğurlu olduğunu etiraf edirlər”, – deyə Tural İrfan bildirib.

Siyasi şərhçi qeyd edir ki, əgər Trampın ev sahibliyi edəcəyi görüş baş tutarsa, bu Vaşinqtonun sülh təşəbbüslərindəki aktivliyini və ABŞ Prezidentinin barışdırıcı imicini gücləndirmə niyyətini ortaya qoyur.

“Əvvəlki görüş BƏƏ-nin paytaxtı Əbu-Dabidə baş tutmuşdu və əsas müzakirə mövzusu Zəngəzur dəhlizi ilə bağlı məsələlər olmuşdu. Həmin görüşün nəticəsi müsbət elan edilmişdi. İndi isə sülhlə bağlı işlərin yekunlaşmaq üzrə olduğu müşahidə edilir”.

Tural İrfanın fikrincə, Ağ Evdə keçirilə biləcək görüşdə tərəflərin sülh müqaviləsini imzalaması gözlənilmir. Əsas məqsədin sülhə nail olmaq niyyətinin rəsmi şəkildə bəyan edilməsi olduğu bildirilir. Politoloq əlavə edib ki, belə hallar sülhün daha möhkəm və davamlı olacağına dair nikbinlik yaradır.

Qeyd edək ki, görüşün dəqiq vaxtı və detalları barədə hələlik rəsmi məlumat verilməyib. 

Bəsti Rəfizadə
Sfera.az