Rusiya Avropaya hücum edəcək? - Lavrovdan AÇIQLAMA
“Rusiya Avropa ölkələrinə hücum və ya işğal planlaşdırmır”.
Sfera.az TASS agentliyinə istinadən xəbər verir ki, bunu Rusiyanın xarici işlər naziri Sergey Lavrov deyib.
“Bizim Avropaya hücum, yaxud işğal etmək planlarımız yoxdur”, – deyə Lavrov Qərb kəşfiyyatının Rusiya Prezidenti Vladimir Putinin Avropada təsir dairəsini genişləndirmək üçün işğala hazırlaşdığı barədə yayılan məlumatlarına münasibət bildirərkən qeyd edib.
Nazir, Qərb ölkələrinin ekspert və analitiklərinin də etiraf etdiyi kimi, ABŞ, Kanada və Avropa ölkələrinin hakimiyyət orqanlarının əhalini birləşdirmək məqsədilə Rusiyanı düşmən obrazında təqdim etdiyini, informasiya manipulyasiyası ilə ölkənin “şeytanlaşdırılmasına” çalışdığını vurğulayıb.
Lavrov bildirib ki, mifik Rusiya təhlükəsini şişirtməklə Qərb liderləri öz ölkələrindəki inflyasiya, artan işsizlik və qeyri-qanuni miqrasiya kimi daxili problemlərdən diqqəti yayındırmağa çalışırlar.
O, həmçinin Avropada rusofobiyanın gücləndirilməsindən, hərbi-sənaye kompleksinin yenidən fəallaşdırılmasından və Rusiya Federasiyasına qarşı mübarizəyə çağırışlardan narahat olduqlarını söyləyib.
Xatırladaq ki, bundan əvvəl Avropanın Rusiyaya qarşı mübarizə aparmaq üçün “üç milyon pilotsuz təyyarə”dən ibarət Aİ ordusu yaratmağı təklif etdiyi bildirilmişdi.
Fidan Hacızadə
Sfera.az
